फिफा वरीयताय् नेपाः क्वय् कुहांवल
येँ (झीगु स्वनिगः)
नेपाल फिफा वरीयता क्रमय् छगू थाय् क्वय् कुहांवःगु दु । विश्व फुटबलया सर्वोच्च संस्था फिफां प्रकाशित याःगु वरीयता क्रमय् नेपाल १ सय ७३ औं थासय् लाः वःगु खः । दक्षिण एशियाली क्षेत्रय् नेपाल अफगानिस्तान -१९५) व भुटान (१९७) न्ह्यःने लानाच्वंगु दु । नेपाः स्वयाः च्वय् दुगु भारत १४४, बङ्गलादेश १५८, माल्दिभ्स १६१, श्रीलङ्का १६२ व पाकिस्तान १७१ औं थासय् लानाच्वंगु दु ।
थुकथं हे एपीयाकथं विश्वविजेता लिसे युरोपेली च्याम्पियन स्पेन फिफा वरीयताय् नम्बर एकया थासय् कायम दु । सन् २०२२ य् विश्वकप आयोजना यायेगु अधिकार दुगु कतार गुंगू स्थान च्वय् थहांवनीगु दकले तःधंगु फेरबदल जुल ।
फिफा वरीयताय् स्पेनलिपा छसिकथं हल्यान्ड, जर्मनी, ब्राजिल व अर्जेन्टिना लाःगु दु । शीर्ष स्वीगू थासय् क्रोसिया व इजिप्टया वरीयता जक फेरबदल जूगु दु । क्रोसिया गुंगूगु थासय् थहांवःगु दुसा इजिप्ट झिगूगु थासय् कुहांवःगु दु । थुगुसी स्वीन्यागू मैत्री कासा जक जूगुलिं वरीयता क्रमय् खासै उलि फेरबदल मजूगु खः । कन्केकाफ क्षेत्रय् अमेरिका (१८) व एशियाय् अस्ट्रेलिया (२६) शीर्ष थासय् लानाच्वंगु दु । ओसियाना क्षेत्रय् दकले न्ह्यःने दुगु न्यूजिल्याण्ड ६३ औं थासय् लाःगु दु ।
