खुक्वःगु ढोरपाटन 'ब्लु स्काइ कप' मिसा भलिबल डबल लिग कासा क्वचाल
ज्ञानुबाबा लगातार न्याक्वःगु खुसिइ च्याम्पियन
येँ (झीगु स्वनिगः)
साविक विजेता ज्ञानुबाबां खुक्वःगु ढोरपाटन 'ब्लु स्काइ कप' मिसा भलिबल डबल लिग कासाया उपाधि त्याकाः बिहीबाः लगातार न्याक्वःगु च्याम्पियन जूगु दु । गोंगबुस्थित न्हू बसपार्कय् ज्ञानुबाबां नेपाल प्रहरीया हाथ्या २५-१६, २२-२५, २५-१९ व २५-२० पाखें बुकल । न्हापांगु चरणया लिगय् नं प्रहरी ज्ञानुबाबालिसे बूगु खः । फुक्क १३ कासाय् बूम्ह ज्ञानुबाबां ३९ अंक कालसा ३५ अंकलिसे प्रहरी निगूगु थासय् लात । ज्ञानुबाबां २ लाख ३ हजार ल्हातय् लाकलसा प्रहरीं १ लाख २ हजार तकाय् मन तल । कासाया मेगु कासाय् टप्स व एन्जल्स हर्ट त्याःगु खः । टप्सं शहीद स्मृति क्लब -कास्की) यात २५-१९, २५-२० व २५-१७ या सेटय् बुकल । २९ अंकलिसे टप्स स्वंगूगु थासय् लाःगु खः । टोप्सं ५१ हजार त्याकूगु खः । २१ अंकय् शहीद स्मृति क्लब न्यागूगु थासय् लाःगु खः । उमिसं २० हजार तका त्याकूगु खः ।
एन्जल्स हर्टं न्यू डाइमण्डयात २५-१७, २५-१८, २४-२६ व २५-१८ या ल्याखं त्याकल । शहीद स्मृतिलिसे २१ अंक हे जूसां नं औसत अंक आधारय् न्यू डाइमण्ड खुगूगु थासय् सीमित जूगु खःसा एन्जल्स हर्ट न्हय्गूगु थासय् लाःगु खः ।
