स्वन्हुया गोष्ठीइ क्वचाल
येँ (झीगु स्वनिगः)
नेपाल प्रज्ञा प्रतिष्ठान, नेपाली भाषा व्याकरण कोष विभागं नेपाली भाषा व्याकरणया प्रयोग क्षेत्रया विस्तारया नितिं सरलीकरणपाखें वनेमाःगु निर्णय याःगु दु । उगु विभागपाखें ग्वसाः ग्वःगु स्वन्हुया गोष्ठीया समापनया लसताय् म्हिगः थनं नेपाली भाषाया एकरुपता, स्तरीकरणया नितिं उगु निर्णय सार्वजनिक याःगु जानकारी बियादिल । संस्कृतपाखें वःगु तत्सम शब्दय् जक ऋ, ञ, ण, क्ष, श, ष या छ्यलेगु तर देवनागरीइ जाति, धर्म, थर, भाषा आदि नांया सन्दर्भय् धाःसा प्रचलनयात हे स्वीकार यायेमाःगु, सङ्ख्या वाचक शब्दया आदि व मध्यमय् र्हस्व च्वयेमाःगु लगायत निर्णय याःगु दु ।
नेपाल प्रज्ञा प्रतिष्ठानया कुलपति वैरागी काइँलां नेपाली भाषा व्याकरणय् न्ह्याग्गु न्ह्यात्थेंज्याःगु समस्यात दु उकिया निरुपणया नितिं भाषाविद्तलिसे अझ बृहत् सहलह यायेमाःगु धयादिल । साहित्यकार डा. लक्ष्मीप्रसाद पराजुलीं नेपालय् जक मजुसे देय्या थीथी थासय् नं भाषाया विवाद जुयाच्वनीगु जुयाः नेपालय् थुकिया समाधानया नितिं बृहत् सहलहया आवश्यकता दुगु खँ कुलादिल । उगु गोष्ठी थ्वहे पुस २६ गतेनिसें न्ह्याःगु खः ।
