विस्थापित जुइगु त्रासय् सुकुम्बासीत

विराटनगर (झीगु स्वनिगः)

विराटनगर-१९ व २० य् दुगु २ सय ८० छेँखा सुकुम्बासी विस्थापित जुइगु आशंकां समस्या जुयाच्वंगु दु । राजनीतिक दलतय्गु असावधानीया कारण उपिं विस्थापित जुइमाःगु पीडाय् वाथा वाथा कनाच्वंगु दु । सरकारी स्वामित्वय् सञ्चालित विराटनगर जुट मिल बन्द जुइवं मिल जःखःया बासिन्दां उगु क्षेत्रयात त्वःनेमाःगु जूगु खः । मिल बन्द जुइधुंकाः अनं ज्या यानाच्वंपिं मजदुरतय्गु बेतन लिसे क्षतिपूर्ती बापत धेबा काःसां नं मिल क्षेत्र जःखः त्वःतेमाःगु बाध्यकारी नियमया कारण उपिं छेँ बुँ बिहीन अवस्थाय् थ्यनेत्यंगु खः । पञ्चमुखी टोल, हड्ताली हाट, हरिनगर भट्टा -क व ख), मिलया दक्षिण गेट लिसे दरैया क्षेत्रया करिब २ सय ८० छेँया परिवार विस्थापित जुइगु पीडाय् दु । उमिसं थःपिं च्वनाच्वनागु थासं चीलेत नगरपालिका लिसे स्थानीय प्रशासनं ख्याच्वः ब्यूगु नुगः खँ प्वंकादिल ।

सुकुम्बासी संघर्ष समितिया नायः गोपालप्रसाद साहं उपमहानगरपालिकां बिइगु विकासया सुविधा नापं उगु क्षेत्रपाखें म्हो यानाः यंकाः मत, लः, बिद्युत लगायतया सुविधा नापं थःपिंत मब्यूगु जानकारी बियादिल । नेपाल बसोबास बस्ती समितिया नायः हरिकाजी श्रेष्ठं सरकारं पूर्ण व्यवस्था मयासे बस्ती उठय् यायेगु कुतः याःसा आन्दोलनय् वनेगु ख्याच्वः बियादिल । वय्कलं तःदँनिसें च्वनाः वयाच्वंपिंत जमिनया उचित मूल्याङ्कन याकाः दामासाही ब्यूसां नं मान्य जुइगु जानकारी बियादिल । मिल बन्द जुयाः सर्वदलीय संयन्त्र, स्थानीय प्रशासन, मिल व्यवस्थापन लिसे मजदुरदथुइ जूगु सहमतिया आधारय् मिलय् ज्या यानाच्वंपिं मजदुरतय्सं उगु क्षेत्रपाखें पिने स्थानान्तरण जुइमालीगु बाध्यकारी नियम तःगु दु ।