त्वनेगु लःया मुहान हे फोहर वांछ्वयेगु थाय्
ख्वपः (झीगु स्वनिगः)
ख्वप व येँया आपालं थासय् वितरण जुइगु मनोहरा खुसिया बोडेस्थित खानेपानी प्रशोधन लिसे वितरण केन्द्रया मुहान फोहर वांछ्वयेगु थाय् जूगु दु । त्वनेगु लःया मुहान हे तरकारी सिलेगु, सा, मेय् ज्वये हयेगु, म्वःल्हुइगु, वसः हिइगु, भ्वं सिलातःगु लः वांछ्वयेगु यानाः बियाः फोहर अप्वयाः वंगु खः । अथेहे मुहानया उखेथुखे भ्वाथःगु लं, पुलांगु लाकां, चप्पल, बङ्गुरया च्व, गांपाखें पिहांवइगु फोहर वांछ्वयेगु यानाच्वंगु दु । न्हय्दँ न्ह्यः जापान सरकारया ग्वाहालिइ निर्माण जूगु बोडे खानेपानी आयोजनां खुसिइ लायाःतःगु जाली गुनावयेधुंकूगु दुसा खुसिइ फि लिकायेबलय् वइगु फोहर बुलुगु लः नापं अनं हे वयाः मुनेगु यानाच्वंगु दु ।
जापान सरकारं दयेका ब्यूगु आपालं लः सालेगु पम्प स्यनेधुंकूगु दु । मुहानया जःखः फोहर दु । मुहानया लः डगबेलय् सङ्कलन यानाः प्रशोधन केन्द्रय् छ्वयेधुंकाः कीटनाशक वासः छ्यलाः शुद्ध दयेकाः लः त्वनेगु नितिं योग्य याइगु प्रशोधन केन्द्रया प्राविधिकं धाःगु दु । न्हियान्हिथं छगू त्या करोड लिटर लः मध्यपुर थिमि, ख्वप, बानेश्वर, थापाथली लगायत थीथी क्षेत्रय् वितरण याइ । काठमाडौं उपत्यका खानेपानी लिमिटेड थिमि शाखां धाःसा इलय् ब्यलय् मुहानया सरसफाइ यायेगु याःसां नं स्थानीय जनताया लापरबाही पनेमफूगु जानकारी ब्यूगु दु ।
