सहमतिया सरकार माओवादी सरकार

श्रावण ५ गतेनिसें न्ह्यानाच्वंगु प्रधानमन्त्रीया ल्यज्या म्हिगं छगू अप्रत्यासिव रुपं क्वचाःगु दु । व्यवस्थापिका संसदया वैठक शुरु जुइ न्याघौ न्हृयःतक्क उम्मेदवारी मत्वःतेगु अडान कयाच्वंम्ह नेपाली कांग्रेसया छम्ह जक उम्मेदवार रामचन्द्र पौडेल अन्तत नां लित कायेत वाध्य जूगु खः । थःपिनिगु गठवन्धनया छगू प्रमुख दल एमालें पौडेलयात मत वीगु पल्सा नां लित कायेत इनाप यायेवं कांग्रेसी उम्मेदवार पौडेलया प्रधानमन्त्री जुइगु म्हगस चुंचुं जूगु खः । थुकिया नितिं नेपाली कांग्रेस थःगु पालि निसें बल पिकयाः गठबन्धन तज्याइगुया नाप नापं सरकारं कांग्रेसत पिहां वनेगु तक्क ख्याच्वः विलं नं एमालें नां लित मकाःसा विपक्षय् मत वीगु निर्णय न्हापाहे यानातःगु खः । थःपिनिगु पार्टीया विपरित प्रधानमन्त्री माधवकुमार नेपाल व केपि शर्मा ओलीं पौडेलया पक्षय् मत बीकेगु धाःसां अन्तत संस्थापन पक्षय् ल्हातय् निर्णय वनेवं थुमिगु आश्वासनं पौडेलयात छुंहे याये मफूगु खः । नां लित कायेत पौडेलयात पत्र नापं प्र.म. नेपालं छ्वयाः लिपा न्हृयाइगु चक्रीय प्रणालीइ जूसां नेपाल व ओलीं ग्वाहालि वीगु धाःगु खः । तर माःगु इलय् मदुगु ग्वाहालि छु यायेत धया थें पौडेलपिं एमाले छगूकथं निराशहे जूगु खः ।

नां लितकाये न्हृयः नेपाली कांग्रेसं थप टिकडम यायेत नं स्वःगु खः । दकले न्हापांला थ छलफल याये माःगुलि संसदया वैठक छन्हु लिछ्वयेत इनाप याःगु खः । एमाले पाखें ग्वाहालि मवःगु अवस्थाय् म्हीग न्हिनय् च्वंगु माओवादी नापया मुंज्याय् कांग्रेस चक्रीय प्रणाली न्ह्यब्वयाः न्हापांगु नेतृत्व कांग्रेसयात याकेत प्रस्ताव यायेगु ज्या जूगु खः, थुकियात कयाः माओवादीं मज्यू धायेवं वैठक छन्हु लिछ्यायेगु खँयात नं अस्वीकार जुइवं कांग्रेस हीमी चाःगु खः । आः प्रधानमन्त्रीया ल्यज्या न्हूगुहे प्रकृयाकथं न्हृयःनेवनीगु जूगु दु । थुकियानितिं नियम तकं भिंकेगुपाखें वनीगु जूगु दु । सहमतीय सरकार दयेकेगु, मफुसा बहुमतीय सरकार गठन यायेगु न्हूगु लँपुइ दुहांवनीगु निश्चित जूगु दु । आः नेपाली कांग्रेस व एमाले वा मधेशवादीतय्त मखु, एकीकृत नेकपा माओवादीयात सरकारया नेतृत्व याकेमाः । एमाले नेतृत्व यानाः देशयात झ्वाकलय् थुनावी धुंकल । आः सरकारय् सहभागी कांग्रेसयात मखु, माओवादीयात हे बीमाः । संविधानसभाय् दकले तःधंगु दल, अग्रगामी शक्ति, राजनीतिक एजेण्डात माओवादीयाःगु जूगु लगायत खँया आधारय् आः माओवादीयात सरकारया नेतृत्व याकेमाः । थौंया अप्वः राजनीतिक अवरोधत चीकाः शान्ति व संविधानयात पूर्णता वीत, लोकतान्त्रिक गणतन्त्रयात व्यवस्थित यानाः यंकेत, धर्मनिरपेक्षता, आत्मनिर्णयया अधिकार सहित स्वायत्त राज्यया स्थापना लगायत वर्तमान राजनीतिक मुद्दातय्त सम्वोधन यायेत व याकेत माओवादीया नेतृत्वय् सरकार दयेकेमाः । माओवादीं जक थौंया राजनीतिक समस्यातय्गु समाधान सम्भव जुइ । मेमेगु राजनीतिक संसदीय दलतय्गु पाखें थ्व ज्या जुइ हे मफैगुलिं आःया सहमतिया सरकार माओवादीया सरकार खः ।

More Stories Like this