अमेरिकाया मिखाय् भ्रमण बर्ष
येँ (झीगु स्वनिगः)
नेपाल पर्यटन दँ २०११ औपचारिक रुपं घोषणा याइगुया छन्हु न्ह्यः म्हिगः विहिवाः अमेरिकां थःगु देय्या नागरिकतय्त नेपाल भ्रमणय् सचेत जुइत इनाप याःगु दु । नेपाल भ्रमणबारे अमेरिकी सरकारं 'ट्राभल एड्भाइजरी'सं सुरक्षास्थिति अझ नं बांमलानि धकाः सचेत जुइत थःगु देय्या नागरिकतय्त इनाप याःगु दु । २०१० या जुन १५ तारिकय् जारी याःगु भ्रमण सुझावयात विस्थापित यानाः जारी याःगु न्हूगु 'ट्राभल एड्भाइजरी'सं न्हापाया तुलनाय् सुरक्षास्थितिइ छुं सुधार खनेदुसां छुं नं इलय् हडताल नापं मेमेगु ज्याझ्वःत जुइफुगु संभावना दुगुलिं आः सुरक्षित भ्रमणया नितिं इनाप याःगु दु ।
स्वनिगः नापं शहरी लागाय् हत्या, यौनिक हिंसा, लुटपाटया घटनात जुयाच्वंगु उल्लेखयासें प्रहरीं अज्वःगु घटनात नियन्त्रणय् काये फयाच्वंगु मदु धकाः न्ह्यथंगु दु । थ्व हे झ्वलय् सरकारं पर्यटन वर्षया औपचारिक उलेज्या याइगु लसताय् थौं स्वनिगलय् सार्वजनिक विदा ब्यूगु दु ।
