नेवाः स्वायत्त राज्यया नितिं शक्ति प्रदर्शन
किपुलिइ स्वशासनया अभ्यास यायेगु घोषणा
यल (झीगु स्वनिगः)
संघीय गणतान्त्रिक नेपालय् नेवाः स्वायत्त राज्यया सुनिश्चितताया नितिं आन्दोलन यानाः वयाच्वंगु नेवाः स्वायत्त राज्य मंकाः संघर्ष समितिं म्हिगः यलया पूच्वय् नेवाः एकता दिवस हनेगु झ्वलय् आः नेवाः स्वायत्त राज्यया अवधारणा कथं स्थानीय निकायसं अभ्यास यायेगु झ्वलय् आः दक्ले न्हापां किपू नगरपालिकाय् यायेगु धकाः घोषणा याःगु दु । मंकाः संघर्ष समितिया सचिवालय्या कजि मल्ल के सुन्दरं नेवाः एकता दिवसया सवालय् न्वंवायेगु झ्वलय् आः नेवाः स्वायत्त राज्यया अवधारणा कथं किपुलिइ अभ्यास यायेगु धकाः औपचारिक रुपं हे घोषणा यानादीगु खः । मंकाः संघर्ष समितिया नायः सानुराजा शाक्यया सभापतित्वय् जूगु उगु ज्याझ्वलय् आवंलि नेवाः दुने जातजातिया विभेद मदु धकाः नेवाः राष्ट्रिय राजनीतिक सम्मेलनं पारितयाःगु यात नेवाःतय्गु थीथी जात जातिया प्रतिनिधितय्सं सार्वजनिक रुपं उकियात अनुमोदन यानागु जुल धकाः प्रतिबद्धता प्वंकेगु ज्या जूगु खः ।
उगु ज्याझ्वलय् वइगु माघ ३ गते लुमन्ति पौ लःल्हायेगु घोषणा नं याःगु खः । नेवाः स्वायत्त राज्यया सुनिश्चिता, धर्म निरपेक्षता व गणतन्त्रयात संस्थागत यायेमाःगु, नेवाः स्वायत्त राज्य दुने नेवाःतय्गु अग्राधिकार दयेमाःगु नापं थीथी कथंया खँ दुथ्याकाः अथे लुमन्ति पौ बिइगु धकाः घोषणा याःगु खःसा उगु पौ नेवाः ल्याय्म्ह न्ह्यलुवाःया नायः नरेशवीर शाक्यं ब्वना न्यंकादीगु खः । मंकाः संघर्ष समितिया सल्लाहकार प्रेमशान्ति तुलाधरं नेवाः समुदाय दुने जातीय विभेद क्वचाःगु घोषणा नापं लैंङगिक विभेद नं क्वचायेमाः धयादिसें नेवाः स्वायत्त राज्य दुने बच्छि मिसा बच्छि मिजं जुइमाः धकाः बहः बियादिल । लोकतान्त्रिक नेवाः दबूया नायः नेमसिंह नकःमिं बोडे घोषणा पौ न्यंकादीगु खः । नेवाः जागरण मञ्चया कजि सुजीव बज्राचार्यं नेवाः राष्ट्रिय राजनीतिक सम्मेलनपाखें पारित याःगु स्थानीय निकायसं हस्तक्षेपकारी ज्याझ्वः ब्वनाः न्यंकादीगु खः । नेवाः देय् गुथि नेपाल मण्डलया नायः नरेन्द्रभक्त हाडां इलंहाःगु समसामयिक प्रस्ताव न्ह्यब्वयादीगु खः । नेवाः देय् दबूया नायः नरेश ताम्रकारं थीथी जातिया प्रतिनिधितय् जातीय विभेद क्वःचाःगु प्रतिबद्धता प्वंकादीगु खः । ज्याझ्वलय् नेवाः एकता दिवस व्यवस्थापन समितिया कजि प्रेम महर्जनं लसकुस न्वचु बियादीगु खः । अथे हे सुभाय् न्वचु बिइगु झ्वलय् ज्यापु महागुथिया मूछ्याञ्जे राजभाई जकःमिं नेवाः स्वायत्त राज्य मवल धाःसा आः सांस्कृतिक बहिस्कार यायेगु जुइ धकाः घोषणा यानादिल । उगु हे कथं बौद्ध विहार संघ यलया नायः बाबुराजा बज्राचार्यं सुभाय् न्वचु बियादीगु खः ।
थीथी कथंया सांस्कृतिक बाजं नापं थःथःगु ब्यानर ज्वनाः ब्वति काःगु द्वलंद्वः नेवाःतय्सं ब्वतिकाःगु खःसा यलया पूच्वय् मुनाः औपचारिक रुपं ज्याझ्वः न्ह्याके धुंकाः जुलुस यलया थाय् थासय् चाःहिलाः हाकनं पूच्वय् हे थ्यंकाः सभा यानाः क्वचायेकूगु खः । स्वनिगःया येँ, यल, ख्वप, थिमि, किपू नापं गां गामं व थाय्थासं द्वलंद्वः नेवाःत सतकय् उगु कथं क्वहांवःगु धैगु नेवाः स्वायत्त राज्यया नितिं छगू कथं शक्ति प्रदर्शन खः धाःसां छुं पाइमखु ।
