नेवाः समुदाय दुने जातिय विभेद क्वचाल

नेवाः समुदाय दुनेया थीथी जातिय संगठनतय्सं नेवाःत दुने जातिय विभेद क्वचाःगु घोषणा याःगु दु ।

जनस्तरं नेवाः स्वायत्त राज्य घोषण याःगु दच्छि पूवंगु लसताय् बिहीवाः यलया पुच्वःय् नेवाः स्वायत्त राज्य मंकाः संघर्ष समितिं ग्वसाः ग्वःगु नेवाः एकता दिवसय् थीथी २९गू जातिय संगठनया छम्ह-छम्ह मिसा व मिजं आधिकारीक प्रतिनिधितय्सं उगु प्रतिबद्धता प्वंककूगु खः ।

वंगु कछलागा १३ व १४ कुन्हु बोडय् जयस्थिति मल्लं नेवाः समुदाय दुने जारी याःगु जातिय प्रथायात क्वचाःगु घोषणा याःगु खः । उकियात हे बिहीवाः अनुमोदन याये कथं जातिय खलः पुचःया प्रतिनिधितय्सं प्रतिबद्धता प्वंकूगु खः । नेवाः देय् दबूया नायः नरेश ताम्रकारं उगु प्रतिबद्धता याकादीगु खः ।

संघर्ष समितिया नायः सानुराजा शाक्यया सभापतित्वय् जूगु ज्याझ्वलय् संघर्ष समितिया सचिवालय कजि मल्ल के. सुन्दरं न्हूगु संविधानय् नेवाः स्वायत्त राज्य दुथ्याकेगु कथं थुगु एकता दिवस हनाच्वंगु धयादिसें उकीया निंतिं दकलय् न्हापां नेवाःत दथुइ हे एकता आवश्यक जूगु धयादिल ।



अथेहे संघर्ष समितिया सल्लाहकार प्रेमशान्ति तुलाधरं नेवाः समुदाय दुने जातिय विभेद क्वचाःगु घोषणा नापं लैङ्गिक विभेद क्वचाःगु घोषणा नं जुइमाःगु माग यानादिल । ज्यापु महागुथीया मूछ्याञ्जे राजभाइ जःकमिं जातिय विभेद क्वचाःगु घोषणा जक जुयां मगाः, जातिय विभेद याइपिंसं माफी नं फ्वनेमाःगु व उकीयात व्यवहारय् नं लागु यायेमाःगु धयादिल । बौद्ध विहार संघ यलया नायः बाबुराजा बज्राचार्य आः याकनं हे नेवाः स्वायत्त राज्यया आन्दोलनय् बौद्ध विहार संघ नं सक्रिय जुयाः न्ह्याः वयेत्यंगु जानकारी बियादिल ।



ज्याझ्वलय् बोडे क्वचाःगु नेवाः राजनीतिक सम्मेलनय् जारी बोडे घोषणा पत्र, इलंहाःगु राजनीतिक प्रस्ताव व तत्कालीन हस्तक्षेपकारी निर्णय नं ब्वना न्यंकूगु खः । अथेहे ज्याझ्वलय् वइगु माघ २ गते नेवाःतय् माग न्हूगु संविधानय् सम्बोधन यायेमाःगु माग यासें संविधानसभाया नायः सुभाषाचन्द्र नेम्वाङयात स्मरणपत्र लःल्हायेगु जानकारी ब्यूगु दु ।

औपचारीक ज्याझ्वः न्ह्यः थीथी खलः पुचलं सांस्कृतिक ज्याझ्वः न्ह्यब्वःगु खःसा उगु हे इलय् नेवाः राजनीतिक सम्मेलनया भिसीडि व नेपालभाषाया न्हूगु लय्पौ 'पाचिना' नेपालभाषाया चान्सलर सत्यमोहन जोशीं उलेज्या यानादीगु खः । सम्मेलनया भिसिडी नेवाः लोकतान्त्रिक संघया पिथनाय् वःगु खःसा पाचिना संचार नेपाल प्रा लिया पिथनाय् पिहांवःगु खः ।



अथेहे ज्याझ्वलय् थीथी खलः पुचतय्सं जातिय विभेद क्वचाःगुयात अनुमोदन यायेधुंकाः छगू तःजिगू जुलुस यल देय् चाहिउगु खः । द्वलंद्वः मनूतय्सं ब्वति काःगु जुलुस बुंगःद्यः सालीगु रुट चाहीला हानं पुच्वःय् वयाः सभाय् हिउगु खः ।

More Stories Like this