नेवाः एकता दिवसया अन्तिम तयारी क्वचाल

जनस्तरं नेवाः स्वयात्त राज्य घोषणा याःगु दच्छि पूवंगु लसतय् कन्हय् यलया पुच्वःय् नेवाः एकता दिवस तःजिगू हनेत्यंगु दु ।

नेवाः स्वायत्त राज्य मंकाः संघर्ष समितिया ग्वसालय् जुइत्यंगु उगु एकता दिवसया ज्याझ्वःया अन्तिम तयारी थौं क्वचाःगु दु । अन्तिम तयारी कथं थौं पुच्वःया सतकय् दबू दयेकूगु दुसाः अनया मञ्च व्यवस्थापन नं दक्वं पूवंगु खँ संघर्ष समितिं धाःगु दु ।

एकता दिवसय् विशेष यानाः जयस्थिति मल्लं नेवाः समुदाय दुने जारी याःगु जातीय प्रथायात नेवाः राजनीतिक सम्मेलनं क्वचाल धकाः याःगु घोषणा प्रति थीथी जातिया खलः पुचःया प्रतिनिधितय्सं प्रतिबद्धता प्वंकीगु ज्याझ्वः दु ।

अथेहे नेवाः स्वायत्त राज्यया राजनीतिक प्रस्ताव, स्वायत्त राज्यया निंतिं यायेगु हस्तक्षेपया ज्याझ्वः नापं बोडे घोषणापत्र ब्वना न्यंकीगु व सभा लिपा तःजिगु र्‍याली यल देय् चाहिलीगु ज्याझ्वः दु ।

कन्हय् जुइत्यंगु नेवाः एकता दिवसयात मध्य नजरय् तयाः सुथय् १० बजे लिपा सवारी साधनयात पुच्वः वनेत निषेध याइगु जूगु दु । संघर्ष समिति व यलया ट्रफिक प्रहरी दथुइ जूगु सहलहस यलया कुपन्डोल, सानेपा, जाउलाख्यः, मंगः आदि थासं सभा जःच्छि लँ पनाः पुच्वःय् सवारी साधान छ्वयेमबीगु निर्णय याःगु खः ।

More Stories Like this