न्हूगु गठबन्धन व एमालेया द्विविधा

अन्ततः एमाले व कांग्रेस दथुइ कायम जुयाच्वंगु गठबन्धन त्वाःदलीगु अवस्थाय् थ्यंगु दु। एमालें प्रधानमन्त्री पदय् कांग्रेस उम्मेदवार रामचन्द्र पौडेलयात भोट मबीगु धकाः निर्णय यायेवं कांग्रेसं नं एमालेलिसे न्ह्यानाच्वंगु थःपिनि गठबन्धन त्वाःथलेगु धकाः निर्णय याःगु खः ।

खतुं सरकार गठनय् एमाले व कांग्रेस गठबन्धनया आः छुं अर्थ नं मदयेधुंकल धाःसां जिउ। प्रधानमन्त्री ल्ययेगु लागिं झिंखुक्वः तक जूगु चुनावय् एमालें कांग्रेसयात भोट मबिउगुलिं हे थ्व गठबन्धन अस्तित्वय् मदयेधुंकल धइगु खँ प्रस्ट जूगु खः ।

तर थ्व गठबन्धन कायम जुल धकाः नं देशय् छुं हिउपाः वइगु नं लक्षण मदु। देशय् वःगु राजनीतिक हिउपाःया ल्याखं धायेगु खःसा थ्व गठबन्धन वास्तवय् हिउपाःयात न्ह्यःने यंकेगु सिबें नं उकियात दथुइ हे थाका तयेगु लागिं सक्रिय गठबन्धन धाःसां छुं मपाः। उकिं परिवर्तनकामी जनताया लागिं ला थ्व छगू प्रतिक्रियावादी गठबन्धन धाःसां जिउ। एमाले दुने ब्वलंगु शक्ति संघर्षं थ्व गठबन्धन त्वाःथःगु खः। थुकिया लिच्वः कांग्रेसयात सिबें नं एमालेयात लाइगु यक्व सम्भावना दु। छाय्धाःसां देशय् हिउपाः वःगु पूरा प्रक्रियाय् एमालेया भूमिका उखे नं मलाः थुखे नं मलाःया स्थितिं न्ह्याः वनाच्वंगु दु। आः सरकार गठन जुइगु न्हूगु प्रक्रियाय् नं एमालें स्पष्ट दृष्टिकोण बिउगु खने मदु। एमालेया छगू पुचः अझ नं पुलांगु हे गठबन्धन कायम याना तयेमाः धइगु पक्षय् दनि। माओवादी लिसे जायेमाः धइगु मेगु पुचःलिसे संघर्ष अझ नं जारी दनि। एमालेया बिचाः अझ नं अस्थिर तिनि धइगु थुकिं क्यं ।

More Stories Like this