भारतय् धेबा नापनापं ल्वय्

न्हू दिल्ली (एएफपी)

अप्वः धेबाया कारण अथवा आम्दानी अप्वः जूसां नं भारतीयदथुइ थुकिया हे कारणं स्वास्थ्य अवस्थाय् उलि बांलाःगु प्रगति जुइमफूगु तथ्य छगू अध्ययनं क्यंगु दु । उगु प्रतिवेदनय् भारतीयत गुलि अप्वः धेबा कमय् यानाच्वंगु दु उलि हे आपालं मात्राय् ल्वय् नं कमय् यानाच्वंगु दु धइगु खँयात इंगित याःगु दु । अध्ययनं भारतीयत आपालं धन कमय् यानाच्वंगुलिइ उमिसं स्वास्थ्ययात धाःसा उलि ध्यान बिइमफूगु न्ह्यथनातःगु दु । गुकिं याना बांलाःगु आर्थिक बृद्धि यानाच्वंगु भारतया नितिं थ्व आर्थिक बृद्धि नं नकारात्मक जुइफूगु भविश्यवाणी नं यानाः वयाच्वंगु दु । अध्ययनं प्रष्ट धयाच्वंगु दु कि - भारतीयतय्सं धेबा ला कमय् यानाच्वंगु दु तर न्हियान्हिथं थज्याःगु स्वास्थ्य अवस्थां देय्या आर्थिक विकासया गतियात नं बेकार यानाः बिइफु ।

द्रुत गतिइ अप्वयाः च्वंगु भारतया आर्थिक अवस्थायात अनया नागरिकतय्गु शारिरीक अभ्यासया कटौतीलिसे लनाः स्वःगु दु । अध्ययनं भारतया उच्च पदस्थ स्वास्थ्यया नागरिक लिसे वरिष्ठ चिकित्सकतलिसे भारतीयतय्गु नसा लिसे शारिरीक अभ्यास सम्बन्धी बानीया बारे खँ ल्हाःगु दु । उगु अध्ययनय् कःघानातःगु उपिं चिकित्सकतय्सं व्यापार व्यवसाय लिसे मेमेगु आर्थिक कारोबार लिसे व्यस्तताया कारण भारतीयत शारिरीक अभ्यास यायेमलाइगु व गुकिं यानाः उमिगु दथुइ अप्वयाः वःगु ल्ह्वनाः वइगु, चिनी ल्वय् (मधुमेह) थेंज्याःगु ल्वय्पाखें ताःपाये फयाच्वंगु उलि मदु । म्हिचाय् आपालं धेबा दुगु हे कारण भारतीयत अप्वः शारिरीक परिश्रम युक्त ज्या मयायेगुया लिसलिसे अल्छिपना क्यनेगु व अय्लाः अप्वः मात्राय् सेवनया कारण न्हियान्हिथं खतरापूर्ण जुयाः वनाच्वंगु भारतीय सतकय् दुर्घटनाया शिकार जुइगु यानाच्वंगु अध्ययनय् दु । उगु अध्ययनं म्हिचाय् म्हो जक धेबा दइपिं भारतीय गरिब नागरिकया तुलनाय् धनीया दथुइ झन् अप्वः ल्वय् खनेदुगु नं अध्ययनं प्रष्ट याःगु दु ।

उगु अध्ययनयाबारे बेलायतया छगू पत्रिकाय् छापय् जूगु दु । भारतीयतय्गु जीवन शैलीया बारे याःगु उगु खोजय् उमिगु नयेगु त्वनेगुया लिसलिसे उपिं लिसे समग्र भारतया हे आर्थिक अवस्थाया नापं चित्रण यानातःगु खः ।

More Stories Like this