ढोरपाटन भलिबल कासाय् ज्ञानबाबा व प्रहरी त्यात

येँ (झीगु स्वनिगः)

खुक्वःगु ढोरपाटन 'ब्लु स्काइ कप' मिसा भलिबल डबल लिग धेंधेंबल्लाः कासा अन्तर्गत मंगलबाः जूगु कासाय् साबिक विजेता ज्ञानुबाबा, टोप्स, नेपाल प्रहरी व मजदूर शहीद स्मृति क्लब -येँ)पाखें त्याकेत ताःलाकूगु दु । गोंगबुस्थित न्हूगु बसपार्कय् पोखराया ज्ञानुबाबां पोखराया हे मेगु टोली टोप्सयात २५-१५, २५-१७ व २५-१८ या सेटय् निराश याःगु खः । न्यू डाइमण्ड विरुद्धया कासाय् धाःसा टोप्स २५-१५, २५-२२ व २५-१० या लिच्वलय् कासा त्याकूगु खः । प्रहरीं एन्जल्स हर्टदथुइ २५-७, २५-१० व २५-१० या जित प्राप्त याःगु दु । मजदूरं शहीद स्मृति क्लब -कास्की) यात २५-१०, २५-१८ व २५-१७ या सेटय् बुकूगु खः । झिंछन्हु दिंया कासाया अन्तय् ज्ञानुबाबा ३३ अंक लिसे शीर्ष थासय् हे कायम जुयाच्वंगु दु । ३१ अंकलिसे प्रहरी निगूगु थासय् हे दुसा स्वंगूगु थासय् लाःगु टोप्सया २५ अंक थ्यंगु दु । २४ अंकय् मजदूर शहीद स्मृति क्लब प्यंगूगु, १७ अंकय् साबिक उपविजेता न्यू डाइमण्ड न्यागूगु, १६ अंकय् शहीद स्मृति क्लब खुक्वःगु लिसे १५ अंक एन्जल्स हर्ट न्हय्गूगु थासय् दु । अथेहे, खुक्वःगु ढोरपाटन 'ब्लु स्काइ कप' मिसा भलिबल डबल लिग धेंधेंबल्लाः कासाया उत्कृष्ट कासाया धेंधेंबल्लाःया ब्वाज्याय् न्यू डाइमण्डया रमिला तण्डुकार शीर्ष थासय् लानाच्वंगु दु ।

सोमबाः तक्कया मतगणनाकथं रमिलां सर्वाधिक ४८४९ मत प्राप्त यायेधुंकूगु दुसा निगूगु थासय् लानाच्वंम्ह ज्ञानुबाबाया मञ्जु गुरुङं १३०२ मत कायेत ताःलानाः च्वंगु दु । उत्कृष्ट कासामिपिं ल्ययेगु दर्शक मतया आधारय् यायेगु प्रावधान दुगु खः । कासा स्वयेत न्याःगु टिकटय् दर्शकं थःत उत्कृष्ट ताःगु कासामिया नां च्वयाः मत प्रकट यायेगु नं प्रावधान दु । उत्कृष्ट कासामिं करिब छगू लाखया लिफानया स्कुटर प्राप्त यायेफइ । धेंधेंबल्लाः कासाया न्यागूगु संस्करणया समाप्तितक्क पोखराया कासामि बाहेक उगु उपाधि सुनां नं त्याकेफूगु मदुनि ।

More Stories Like this