कांग्रेसया घुर्की, ज्या वइमखु

संविधानसभाय् दकले तःधंगु दल एकीकृत नेकपा माओवादीयात याकः बुकः यायेत विस्तारवादी भारतया इशाराय् दयेकूगु नेपाली कांग्रेस एमाले लगायत सत्तापक्षीय दलतय्गु अपवित्र गठबन्धन संकटय् लाःगु दु । थौं जुइगु प्रधानमन्त्रीया झिंच्याक्वःगु ल्यज्याय् नेपाली कांग्रेसया छम्ह जक उम्मेदवार रामचन्द्र पौडेलयात एमालें ग्वाहालि मयाइगु जूगु दु । एमालें थःपिनिगु पुलांगु अडानयात हे दोहरे यानाः घुर्कीया लिसः ब्यूगु दु । कांग्रेसया उम्मेदवार पौडेलया पक्षय् थःपिनिगु मत बीकेत सोमवाः सिंहदरबार व बल्खुस्थित एमालेया केन्द्रीय ज्याकुथिइ निक्वःतक्क मुंज्यां च्वंसा - लिच्वः पिहां मवयेवं पौडेलया प्रधानमन्त्री जुइगु जोश बुलुंबुलुं ख्वाउँयाः वंगु दुसा नेपाली कांग्रेसं पुलांगु गठबन्धन तज्याइगु व थःपिं सरकारं पिहां वनेगु ख्याच्वः नापं बीधंकूगु दु । तर एमालें प्रधानमन्त्रीया उम्मेदवारी त्वःताः न्हुगु प्रक्रियाय् वनेमाःगु व चुनाव जुहे जुल धाःसा एमालें विपक्षय् मत बीगु थःपिनिगु निर्णयत दोहरे तेहरे यानाः न्यंकाबी धुंकूगु दु । नेपाली कांग्रेसं प्रधानमन्त्रीया उम्मेदवारी त्वःताः न्हूगु प्रक्रियाय् दुहां वनेगु मनस्थिति दयेकेफूगु मदु । सत्ताया लोभं देशयात अनिर्णयया बन्दि यायेत वा यानातयेत छुं हे कसर मत्वःतीगु खनेदु । देशय् राजनीतिक गतिरोध यथावत तयाः सत्ता थःपिनिगु हे ल्हातय् केन्दि्रत यानातयेगु नेपाली कांग्रेसया चाहना अन्ततः प्रतिक्रियावादी व प्रतिगामी सोचया हे कारणं खः । उखे एमालें विपक्षय् मत बिल धायेवं माओवादीया मत व मेगु चिचीधंगु दलतय्गु मत नापं यानाःबहुमत विपक्षय् लाइ । न्हापा न्हापा थें छुं नं दल आः तटस्थ च्वनेदैमखु व सर्वोच्च अदालतं उकियात कयाः निर्देशन नाप जारी यायेधुंकूगु दु । बहुमतं प्रधानमन्त्रीया छम्ह जक उम्मेदवार पौडेल पराजित जुइवं थुगु प्रक्रियायात हे अन्त यायेगु खँ संविधानसभाया अध्यक्ष सुवास नेम्वाङ्गं धयादीथें वन धाःसा कमसेकम निणर्यक रुप कायेमफैगु छगू अवस्थाया अन्त जुइ व न्हूगु चरणय् दुहां वनी ।

थुकिया लिपा सरकारं नेपाली कांग्रेस पिहां हे वंसां व कांग्रेस एमालेया गठबन्धन तज्याःसां थ्व देशया नितिं धाःसा सुखद् हे जुइ । न्हूगु सरकार दयेकेगु लँपु चाली पुलांगु कतांमरि व कामचलाउ सरकारया अन्त जुइ । न्हूगु सरकार माओवादीया नेतृत्वय् वा एमालेया नेतृत्वय् न्ह्याम्हय्सिगु नेतृत्वय् सरकार गठन जूसां न्हूगु परिवेशय् न्हूगु स्थितिइ न्ह्याःवनी । चुनावं त्याःपिं व लोकतान्त्रिक परिपाटीयात न्ह्यःने यंकी । न्हूगु सरकारं भारतीय हस्तक्षेपयात अस्वीकार याइ ।

More Stories Like this