जनजाति महासंघया नेतातय्गु विरुद्ध आन्दोलन

श्रीकृष्ण महर्जन

नेपाःया आदिवासी जनजातिया हक अधिकार न्हूगु संविधानय् सुनिश्चित याकेगु नितिं राजनीतिक दल व संविधानसभाया दुजःतय्त दबाव बिइमाःगु इलय् नेपाःया आदिवासी जनजातिया दथुइ थवं थवय् ल्वापु जूगु बुखँ ब्वने दयाः जातीय राज्यया विरोधीत नापं संघीयता विरोधीत न्हिला च्वंगु दु । नेपाःया आदिवासी जनजातितय्गु मंकाःगु संगठन नेपाल आदिवासी जनजातिया नेतृत्वं आदिवासी जनजातिया माग कथं जातीय स्वायत्तता नापंया स्वशासनयात सुनिश्चित यायेगु नितिं माःगु कथं भूमिका म्हितेगु ज्या मयात धकाः आदिवासी विद्यार्थी समाजं आन्दोलन याःगु दु ।

उगु समाजया नायः शक्ति वान्तवा (चट्टनं) धयादिल 'जनजाति महासंघं विदेशं ध्यबा हयाः थवं थवय् क्वथाय् च्वना गोष्ठी यायेगु अले ध्यबा फुकाः बास्तविक पीडित जनजातिया बेवास्ता यानाच्वंगु नापं आदिवासी जनजातिया हक अधिकारया नितिं माःगु इलय् माःगु कथंया आन्दोलन मयागुलिं इमित ठिक थासय् हयेगु नितिं महासंघया नेतृत्व विरुद्ध आन्दोलन यानागु खः, वंगु सोमवाः महासंघया नायः व महासचिवया कुर्सि च्याकेगु ज्या सांकेतिक कथं जक यानागु खः, माल धाःसा अझ सशक्त आन्दोलन यायेत विद्यार्थीत तयार दु ।'

अथे हे नेपाल आदिवासी जनजाति महासंघया महासचिव आङकाजि शेर्पां धयादिल 'आदिवासी विद्यार्थी समाज धैगु अराजकतय्गु पुचः खः, इमिसं गुगु कथं महासंघया ज्याकू तोडफोड यायेगु ज्या यात उकियात कयाः घोर भत्सना यानागु दु ।' लिपांगु इलय् वयाः महासंघ छगू राजनीतिक दलया भ्रातृ संगठनया रुपय् ज्या यानाः हक अधिकारया नितिं माःगु कथंया भूमिका म्हितेगु यानाच्वंगु मदु धकाः आदिवासी जनजातिया नेता कार्यकर्तातय्सं नं धयाच्वंगु मदुगु नं मखु । अथे हे विद्यार्थीतय्सं गुगु कथं जनजातिया नेतृत्वयात ख्याच्वः बिल थ्व पाय्छि हे जू धकाः तकं धायपिं नं मदुगु मखु । न्हूगु संविधानय् राज्यया पुनरर्संरचनाय सवालय् ध्यान तयाः गुगु कथं आदिवासी जनजातिया हक अधिकार सुनिश्चित यायेगु धकाः बिचाः यायेमाःगु इलय् आदिवासी विद्यार्थी समाजं दबाव कथं जनजाति महासंघया नेतृत्वयात दबाव बिइमाःगु अवस्था वःगु नापं छगू कथं जनजातिया दथुइ थवं थवय् ल्वापु जूगु बांलाःगु संकेत धाःसा अबश्य नं मखु ।