प्रधानमन्त्रीया नितिं न्हूगु प्रक्रियाय् वनीगु

माओवादी–एमालेया न्हूगु समिकरणया कुतः

येँ (झीगु स्वनिगः)

मुलुकय् न्हूम्ह प्रधानमन्त्री ल्ययेगु नितिं न्हूगु हे प्रक्रियाय् वनीगु प्राय निश्चित जूगु दु । थौं बुधवाः व्यवस्थापिका संसदया मुँज्याय् एकीकृत माओवादी व एमालेया सांसदतय्सं नेपाली कांग्रेसया याकःचा प्रधानमन्त्रीया नितिं उम्मेदवार जुयाच्वंम्ह रामचन्द्र पौडेलया विपक्षय् मत दान याइगु जुइवं पौडेलयात मेगु फुक्क हे मत वन धाःसां मत्याइगु नापं अनंलिपा सभामुख सुवासचन्द्र नेम्वाङं न्हूगु प्रक्रियाय् वनेगु धकाः घोषणा यानादीगु जुयाः मुलुक प्रधानमन्त्री ल्ययेगु नितिं न्हूगु हे प्रक्रियाय् वनीगु जूगु दु । नेपाली कांग्रेसं नं पौडेलया विपक्षय् बहुमत वल धाःसा जक न्हूगु प्रक्रियाय् वनेगु जुइ धकाः धयाच्वंगुलिं आः प्रमया नितिं न्हूगु प्रक्रियाय् वनीगु निश्चित जूगु खः ।

नेपाली कांग्रेसया उम्मेदवार पौडेलया पक्षय् एमालें मतदान मयायेवं कांग्रेसया नेतातय्सं न्हापाया लोकतान्त्रिक वाम समिकरण त्वादली नापं वर्तमान कामचलाउ सरकारय् दुथ्यानाच्वंपिं थःपिनि मन्त्रीतय्त तकं लितसःतेगु जुइ धकाः ख्याच्वः तकं बिइ धुंकूगु जुयाः नं राजनीतिक समिकरणय् नं ह्यूपाः वइगु अवस्था ब्वलना वःगु खः । थ्व हे दथुइ म्हिगः मंगलवाः एकीकृत माओवादीया नायः पुष्पकमल दाहाल व एमालेया नायः झलनाथ खनालया दथुइ वार्ता जूगु इलय् नं आः न्हूगु कथं समिकरण दयेकाः वनेगु नापं याकनं हे न्हूगु सरकार गठन यायेगु सवालय् सहलह जूगु खः ।