विमान दुर्घटनाय् ७७ म्ह सित

इरान (एपी)

उत्तरपश्चिम इरानय् जूगु छगः विमान दुर्घटनाय् न्हय्न्हय्म्ह मनूत सीगु इरानीयन अधिकारीतय्सं जानकारी ब्यूगु दु । प्रान्तीय अधिकृत जाभाद महमोअदीयाकथं इरानीयन राष्ट्रिय एअरलाइन्स जेटयात संकटकालिन अवतरण याःगु इलय् हिमपातय् लानाः न्हय्न्हय्म्ह मनूत सीगु खः । वय्कःयाकथं मेपिं नीन्हय्म्ह घाःपाः जूगु व उपिं मध्ये सुं सुं मनूतय्गु अवस्था चिन्ताजनक दुगु जानकारी ब्यूगु दु ।

तर इरानी यातायात मन्त्री हमिड बेहाहनीयाकथं उगु जहाजय् निम्ह मिजं मचातलिसे सच्छि व न्याम्ह मनूत दुगु व गुकिइ न्हय्निम्ह मनूत सीगु व स्वीस्वम्ह मनूत सामान्य घाःपाः जूगु जानकारी ब्यूगु खः ।
आइतबाः बहनी विमान दुर्घटनालिपा सम्बन्धित अधिकारीं विमानय् सच्छि व खुम्ह मनूत दुगु व न्हय्छम्ह मनूत सीधुंकूगु नं जानकारी ब्यूगु खः । सीपिनिगु ल्याखय् मत भिन्नता दुगु याकनं स्पष्ट जुइमफूगु तर राज्यपाखें न्ह्याकाच्वंगु टेलिभिजनयाकथं बिमानय् प्राविधिक समस्या वयेवं इरानया उत्तर पश्चिम शहर अरुमियेहय् दुर्घटनाग्रस्त जूगु जानकारी ब्यूगु खः ।

More Stories Like this