चिकु अप्वयाः जनजीवन कष्टकर

येँ (झीगु स्वनिगः)

उच्च पहाडी क्षेत्रय् हिमपात व तराईलय् शीत लहरया कारण जनजीवन कष्टकर जूगु दु । हुम्ला, जुम्ला, मुस्ताङ, दोलखा लगायतया उच्च पहाडी क्षेत्रय् अप्वःगु हिमपात व धनुषा, सिरहा, सप्तरी, मोरङ, रूपन्देही, बाँके, कैलाली लगायतया सुदूरपश्चिमनिसें पूर्वी तराई भेगतक्क न्यनाच्वंगु शीत लहरया कारण उगु क्षेत्रया जनजीवन प्रभावित जूगु दु । तराईया थीथी जीलाय् चिकुया कारण छवाःयादुने हे नीन्हय्म्ह मनूत सीधुंकूगु दु । अप्वयाः वःगु चिकुलां विशेष यानाः मस्त, बुराबुरि, श्वासप्रश्वास सम्बन्धी ल्वगि व विपन्न वर्ग प्रभावित जूगु दु । शीत लहरपाखें प्रभावित तराई क्षेत्रय् सार्वजनिक लिसे निजी विद्यालय नापं बन्द याःगु दुसा सरकारी ज्याकुथिइ वइपिं सेवाग्राहीया ल्याः नापं म्हो जूगु दु । अप्वःगु खसुं सतक लिसे हवाइ यातायात नापं प्रभावित जूगु दु । जल लिसे मौसम विज्ञान विभागं थुगु कथंया हिमपात लिसे शीत लहरया प्रभाव अप्वलय् छवाः तक्क जुइगु सम्भावना दुगु धाःगु दु ।