प्रम जुइत फोरम नं इच्छुक

न्हूगु सरकार दयेकेत पहल
एमालेयात प्रस्ताव

नेकपा माओवादीं म्हिगः सरकारपाखें आकाझाकां राजीनामा यायेवं आः न्हूगु सरकार दयेकेगु लागिं माओवादी बाहेकया राजनीतिक पार्टीतय्सं पहल शुरु याःगु दु । आः तत्कालया लागिं न्हूगु सरकारया नेतृत्व यायेगु लागिं संविधानसभाय् स्वंगूगु तःधंगु दल एमालेयात इनाप याःसां मधेशी जनअधिकार फोरमं छु याइ धइगु खँया निर्णय मजूनिगु कारणं सरकारया खाका अझं तयार मजूनि ।

फोरमं थः अध्यक्ष उपेन्द्र यादव विदेश वनाच्वंगु त्वहचिनाः निर्णय मयासे च्वनाच्वंगु दु । परराष्ट्र मन्त्रीया रुपय् विदेश वंम्ह भाजु यादव विहीवाः भूपू मन्त्रीया रुपय् नेपाः लिहां वयेत्यंगु दु । तर फोरमं आधिकारिक निर्णय लिपा जक यायेगु धाःसां थःपिं आः मेपिनि नेतृत्वय् गठित सरकारय् वनेगु स्वयां थम्हं हे सरकार गठन यानाः न्ह्याः वनेगु इच्छा प्वंकाच्वंगु खँ सीदुगु दु । फोरमया नेतात जयप्रकाश गुप्ता व विजय गच्छदारिपंसं एमालें 'छगू मधेश छगू प्रदेश' नीतिया विरोध याःगु कारणं थःपिं एमालेया नेतृत्वय् गठित सरकारय् वने फइ मखु बरु थःपिनि नेतृत्वय् गठित सरकारय् एमाले वःसा गथे जुइ धकाः धायेगु यानाहःगु खँ सूत्रं धाःगु दु ।

लिसें फोरमं संसदया स्वंगूगु तःधंगु पार्टी एमालेया नेतृत्वय् सरकार गठन याये जिउसा प्यंगूगु तःधंगु पार्टी फोरमया नेतृत्वय् जक छाय् मजिउ धइगु तर्क नं तयाच्वंगु खँ सूत्रं धाःगु दु ।

नेपाली कांग्रेसं एमालेया नेतृत्वय् सरकार गठन यायेगु प्रस्ताव तःसां यदि थ्व सम्भव मजुल धाःसा फोरमया विजय गच्छेदारया नेतृत्वय् गठन याःसां जिउ धइगु संकेत बीधुंकूगु खँ नं सीदुगु दु । उकीं फोरम थ्व इलय् मेपिंत सरकार दयेके बियाः थः उकि च्वं वनेगु सिबें नं फयांफछि थःगु हे नेतृत्वय् सरकार दयेकेगु लँपुइ वनेधुंकूगु खनेदु । आःया संसदय् ५३ सीट दुगु फोरमं समर्थन मयात धाःसा कांग्रेस व एमाले जक जानाः सरकार दयेके फइगु स्थिति मदु ।

उखे एमाले दुने नं सरकार गठनया प्रस्ताव वःसां यदि राष्ट्रिय सरकार दयेकेगु जूसा जक नेतृत्वय् वने माली मखुसा सरकारया नेतृत्व मयायेमाली धइगु लाइनय् वनाच्वंगु खँ सीदुगु दु । भावी प्रम कथं चर्चाय् वःम्ह माधव नेपाल सरकारय् वनेत हथाय्चाःसां अध्यक्ष झलनाथ खनालं धाःसा थुकथंया बिचाः न्ह्यःने हयाच्वंगु दु । राष्ट्रिय सरकार जुल धाःसा प्रधानमन्त्री जुइत भाजु खनाल नं तयार दु ।

सरकार त्वःतूम्ह माओवादीं धाःसा प्रधानसेनापतियात थमौती यायेगु राष्ट्रपतिया पलाःया संशोधन मयाःतले थःपिं छुं नं कथंया सरकारय् मवनेगु खँ धायेधुंकूगु दु । छगू सूत्रया कथं यदि एमालें कटवाल चीकेगु वातावरण दयेकेगु खःसा एमाले याकःचिया सरकार दयेकेगु लागिं नं माओवादीं ग्वाहालि याये धयाच्वंगु दु ।