देय्या स्थिति गम्भीर मोडय् : न्वकु किरण
येँ (झीगु स्वनिगः)
एकीकृत नेकपा माओवादीया बरिष्ठ न्वकु मोहन वैद्य किरणं देय्या अवस्था जटिल मोडय् थ्यंगु बिचाः तयादीगु दु । कृपाश्वर स्मृति दिवसया लसताय् येँया जनसञ्चार अभियानय् ग्वसाः ग्वःगु स्मृति सभा लिसे वय्कःया जीवनीलिसे सम्बन्धित एक आस्था पुञ्ज सफू उलेज्या ज्याझ्वलय् नेता किरणं अनमिन लिहाँ वयाच्वंगु इलय् दलतदथुइ सहमति जुइमफूगुलिं स्थिति गम्भीर जूगु धयादिल । प्रधानमन्त्री माधव कुमार नेपालं छुं दिं न्ह्यः माओवादीलिसे सहकार्य जुइमखु धकाः ब्यूगु अभिब्यक्ति गम्भीर व च्यूताः जनक जूगु किरणया धापू दु ।
ज्याझ्वलय् न्ववानादिसें एकीकृत नेकपा माओवादी पोलिटब्यूरो दुजः लिसे ताम्सालिङ राज्य इञ्चार्ज अग्निप्रसाद सापकोटां नेपाली क्रान्ति ताःलाकेत व शहीदतय्गु म्हगस साकार यायेत पार्टी प्रतिबद्ध दुगु धयादिल । थ्वहे दथुइ योद्धा स्व.कृष्णप्रसाद दाहाल कृपाश्वरया निक्वःगु स्मृति दिवस सोमवाः हंगु दु । कृपाश्वर स्मृति प्रतिष्ठानया ग्वसालय् येँया जनसञ्चार अभियानय् स्मृति दिवस हंगु खः । २०५४ सालय् माओवादी जनयुद्धय् वनाः निगू दर्जन स्वयाः आपालं ल्वापुया मोर्चाय् न्ह्यलुवाः जुयाः योद्धा कृपाश्वरया २०५६ साल पुस २६ गतेया दिं क्यान्सर ल्वय्पाखें मदुगु खः ।
