होमस्टे पर्यटनपाखें आकर्षण अप्वल

येँ (झीगु स्वनिगः)

पर्यटन दँ २०११ यात ताःलाकेत सरकारं 'होमस्टे' कार्ययोजना हयेधुंकाः आः पर्यटकीय सम्भावना दुगु ग्रामीण क्षेत्रय् 'होमस्टे' -घरवास) पर्यटनपाखे आकर्षण अप्वःगु दु । आःतक्क ख्वीप्यंगू संस्था घरवास पर्यटन सञ्चालनया नितिं दर्ता जुइधुंकूगु दु । नेपाल भ्रमणय् चाःहिलेत वइपिं पर्यटकत ग्रामीण क्षेत्रपाखे आपालं आकषिर्त जुयाः वयेवं ग्रामीण जनता पर्यटन आकषिर्त यायेत थीथी महोत्सवया ग्वसाः, होमस्टे सञ्चालन लिसे पर्यटकीय सम्पदाया संरक्षणय् न्ह्यःज्यानाच्वंगु दु । थज्याःगु क्रियाकलापं यानाः पर्यटन दँ २०११ य् ख्वीगू प्रतिशतपाखें वृद्धि जुयाः न्हय्न्यागू प्रतिशत पर्यटकत गामय् आकषिर्त जुइगु काठमाडौं रिसर्च सेन्टरं जानकारी ब्यूगु दु । नेपाःया मौलिकताया म्हसीका कायम यानातयेगु गां पर्यटनया अवधारणायात तिबः बिइत घरवास पर्यटन तसकं ग्वाहालि जुइगु सेन्टरया नायः लिसे गां पर्यटनविद् डा सुरेन्द्रभक्त प्रधानाङ्गं जानकारी बियादिल । थौंकन्हय् विदेशी पर्यटकतय्गु च्वनेगु अवधि ११.३२ दिं दुगुलिइ गां गामय् पर्यटकतय्त थ्यंकाः घ्वास पर्यटनया सुविधा उपलब्ध जूसा च्वनेगु ई ताःहाकः जुयाः वनीगु व थुकिं ग्रामीण अर्थतन्त्रय् तिबः जुइगु वय्कःया धापू खः ।

स्वनिगःया येँ, यल, ख्वप, पोखरा, चितवन, खुम्बु क्षेत्र लगायत छुं सीमित क्षेत्रय् जक केन्द्रीत दुगु पर्यटकीय गतिविधियात गां गामय्तक्क थ्यंकेत घरवास अर्थात होमस्टे पर्यटनया विकास व विस्तारय् बहः बिइमाःगु वय्कलं जानकारी बियादीगु दु । पर्यटन दँय् झिगू लाख पर्यटक दुथ्याकेगु लक्ष्ययात पूवंकेत तारे लिसे पर्यटकीय युक्त होटलतय्सं जक फयेफइगु जूगुलिं घरवास पर्यटनयात प्राथमिकता बिइमाःगु खनेदु । थौंकन्हय् तारे लिसे पर्यटकीयस्तरयुक्त न्हय्सः व स्वसः व ख्वीगू होटल दुसा बेड ल्याः नीच्याद्वः व प्यसः व च्यय्न्यागू दुगु खः ।

More Stories Like this