पर्यटनया सम्भावनाय् लाकुरी भञ्ज्याङ

येँ (झीगु स्वनिगः)

यलया उत्तर पूर्वय् दुगु लाकुरी भञ्ज्याङ आन्तरिक व बाह्य पर्यटनया आकर्षक केन्द्र जुयाः वयाच्वंगु दु । येँय्पाखें २८ किलोमिटरया दूरीइ दुगु थ्व क्षेत्र दृश्यावलोकन, पदयात्रा लिसे गुँभ्वय्या नितिं तसकं उपयुक्त गन्तव्यकथं कायेगु याः । स्वनिगःया सहज दृश्यावलोकन लिसे रमणीय पदयात्राया नितिं नं थ्व क्षेत्रयात उलि हे महत्वपूर्णकथं कायेगु याना हयाच्वंगु दु । अथेनं, आन्तरिक व बाह्य पर्यटनया प्रचुर सम्भावना दयेक दयेकं नं थ्व क्षेत्रय् पर्यटकतय्गु नितिं उचित बासस्थान अभावया कारण पर्यटकतय्गु ल्याखय् कमी जुयावःगु स्थानीयबासीतय्सं धयाः वयाच्वंगु दु । बसोबासया नितिं पर्याप्त सुविधा मदुगु कारण सीमित पर्यटकत जक च्वनेगु कथं वनीगु थ्व थासय् आवासीय सुविधा उपलब्ध यायेफूसा पर्यटक अप्वयेफूगु उमिगु धापू दु । भञ्ज्याङ चाःहिलाः येँय् लिहां वयेमलाःपिं पर्यटकतय्त च्वनेत इनाप यायेबलय् उपयुक्त सुविधा मदुगु पर्यटकतय्सं नुगः खँ प्वंकेगु यानाच्वंगु स्थानीय सुनिल पौडेलं जानकारी बियादिल । बासस्थानया अभावया लिसलिसे सुविधाजनक यातायात अभावया कारणं नं आन्तरिक पर्यटकय् कमी वःगु वय्कःया धापू दु । लामाटारया ढुङ्गीननिसें तँ करिब डेढ घण्टाया यात्रा तसकं न्ह्यइपुस्से च्वंगु अनुभव जूगु प्रकृतिपे्रमी समूहया पदयात्राय् ब्वति कयाः लिहां वःम्ह द्वारिका ढुङ्गेलं थःगु बिचाः प्वंकादीगु दु ।

पर्यटनया सम्भावना क्वःबुयाः च्वंगु थ्व क्षेत्रय् भौतिक पूर्वाधार निर्माण यानाः माःगु प्रचार प्रसार यायेफूसा पर्यटकया ल्याखय् वृद्धि जुइफूगु वय्कःया धापू दु । लाकुरी भञ्ज्याङया समयानुकूल पर्याप्त विकास यायेमफूगु कारण पर्यटकया ल्याखय् कमी वःगु लामाटारया बुद्धिजीवीपिनिगु नुगः खँ दु । येँया उकुसमुकुस वातावरणपाखें ताःपाक्क वनेमास्ते वःपिंत एकान्त प्रेमी युगल जोडीया नितिं जक मखु प्रकृतिप्रेमीया नितिं नं बरदान साबित जुयाच्वंगु दु, लाकुरी भञ्ज्याङ । चिकुला व गुँ भ्वय्या सिजन जूगुलिं आः न्हियान्हिथं धइथे हूलका हूल गुँ भ्वय्या नितिं वइगु समूह व एकान्तप्रेमी जोडीया उचित गन्तव्य जुइगु यानाच्वंगु दु, लाकुरी भञ्ज्याङ । लाकुरी भञ्ज्याङया सेरोफेरोदुने हे महत्वपूर्ण धार्मिक लिसे पर्याप्त पर्यटनया प्रचुर सम्भावना क्वःबुयाः च्वंगु ऐतिहासिक विसङ्खुनारायण देगः नं लाःवः ।

विसङ्खुनारायणनिसें लाकुरी भञ्ज्याङतक्कया करिब स्वंगू किलोमिटर दूरीया पदयात्रा पर्यटकया नितिं उचित गन्तव्य मार्ग कथं कायेगु याः । येँय्पाखें १३ किलोमिटर दूरीइ दुगु विसङ्खुनारायण नं धार्मिक लिसे पर्याप्त पर्यटक, गुँ भ्वय् व दृश्यावलोकनया नितिं महत्वपूर्ण कथं नं कायेगु याः । विसङ्खुनारायण सामुदायिक वन जुयाः कोटगां सामुदायिक वन, सिस्नेपानी सामुदायिक वन व पात्लेछाप सामुदायिक वन जुयाः लाकुरी भञ्ज्याङतक्कया पदयात्रा यायेत विदेशी लिसे आन्तरिक पर्यटकत वयेगु यानाच्वंगु विसङ्खुनारायण सामुदायिक वनया नायः कमलबहादुर विष्टं धयादिल । स्वनिगःदुनेया प्रमुख प्यम्ह नारायणद्यःत मध्ये यलया पूर्व उत्तरय् लाःगु विसङ्खुनारायण छम्ह नारायणद्यः खः । हरिसयनी एकादशिनिसें हरिबोधिनी एकादशि अर्थात चतुरमासतक्क विसङ्खुनारायणय् तःधंगु मेला जुइ । धार्मिक हिसाबं विसङ्खुनारायणया द्यः गुफाया छगू हे चट्टानपाखें दयेकातःगु दु, थनं वइपिं आपालं मनूत पिर चिन्तापाखें मुक्त जुइगु धार्मिक विश्वास दु । थुगु क्षेत्रय् पदयात्राया नितिं बुट्यान व झाडी फाडी भ्यूटार निर्माण यायेत याकनं माःगु खनेदुसां नं सरकारी निकायपाखें धाःसा छु नं च्यूताः मक्यंगु स्थानीय मनूतय्गु नुगः खँ दु । धार्मिक, आन्तरिक व पर्याप्त पर्यटनया प्रचुर सम्भावना क्वःबियाः च्वंगु थज्याःगु ऐतिहासिक लिसे प्राकृतिक सम्पदाया संरक्षण यानाः अनं पर्यटकया नितिं माःगु होटल, रेस्टुँरा लगायतया भौतिक पूर्वाधार निर्माण यानाः व्यवस्थित यायेफूसा पर्यटन प्रबर्द्धनय् ग्वाहालि जुइगुया लिसलिसे पर्यटन दँ २०११ यात सार्थक यायेत थप ग्वाहालि जुइगु खनेदु ।

More Stories Like this