बुटवलय् नेपाल अन्तर्राष्ट्रिय संकिपाः महोत्सव
येँ (झीगु स्वनिगः)
कन्हय् पुष २८ गतेनिसें माघ १ गते तक बुटवलय् 'नेपाल अन्तर्राष्ट्रिय आदिवासी संकिपाः महोत्सव' जुइगु जूगु दु । आदिवासीतय्गु संस्कृति व म्हसीका पिब्वयेगु नाप नापं म्वाका तयेगु व विकास यायेगु नितिं अथे संकिपाः महोत्सव यायेत्यंगु खः । उगु महोत्सवय् न्यागू संकिपाः व झिंनिगू डकुमेन्ट्री यानाः झिंन्हय्गू प्रदर्शन याइगु जूगु दु । प्रदर्शनय् दुथ्याइगु फुक्क हे संकिपाः नेपाःया आदिवासी जनजातितय्गु खःसा झिंनिगू डकुमेण्ट्री मध्ये न्हय्गू अन्तर्राष्ट्रिय व न्यागू नेपाःया आदिवासी जनजाति नाप स्वापू दु धकाः धाःगु दु ।
उगु प्रदर्शनय् दुथ्याइगु संकिपाः मध्ये स्वंगू कलेजया विद्यार्थीतय्त शिक्षा बिइगु कथंया खः धकाः धाःगु दु । रुपन्देहीइ प्यक्वःखुसि यायेत्यंगु उगु महोत्सवय् थुगुसी मगर भाषाया 'साली ज्यू,' गुरुङ भाषाया 'स्यो' लिम्बु भाषाया 'चेसुँ' 'लुङ्स पोङ', 'न्यूमा पोङ' नापं मेमेगु संकिपाःत नं दुथ्याइ धकाः धाःगु दु । थुगु महोत्सवय् च्याद्वःम्हसिबें अप्वः दर्शकतय्सं अबलोकन याइ धकाः अनुमान याःगु दु ।
