नेवाः एकता दिवसया सफलता

वइगु २९ गते नेवाः स्वायत्त राज्य संघर्ष समितिं नेवाः स्वायत्त राज्य घोषणा जूगु दच्छि क्यंगु लसताय् नेवाः एकता दिवस हनेत्यंगु दु । नेवाःत थःपिनिगु स्वायत्त राज्य कायेत छप्पँ दु, छधी दु धकाः क्यनेगु उदेश्यं जुइत्यंगु थुगु एकता दिवस नेवाः शक्ति प्रदर्शनया रुपय् न्ह्याइगु निश्चित खनेदु । नेवाः स्वायत्त राज्य कायेत नेवाःत न्ह्यःने वनाच्वंगु इलय् निसन्देह स्वायत्त राज्य संघर्ष समितिइ दुथ्याःपिं झिगू घटकत नं नेवाः स्वायत्त राज्यप्रति प्रतिवद्ध जुइमाः । तर उगु घटकत मध्ये नेपाली कांग्रेस लगायत छु छुं घटकत थौं तक्क नं स्वायत्त राज्यप्रति जक मखु संघीयता प्रतिहे इमान्दार जुइमफु, प्रतिबद्ध जुइमफु । थुकियात खँ अथ्यहे खः धकाः मखं पहछु, मस्यू पहछु यायेगु यानाच्वनेगु पाय्छि मखु । नेवाः स्वायत्त राज्य संघर्ष समितिइ घटकया रुपय् च्वनाः हरेक निर्णयलय् आपत्ति व अवरोध यायेगु अले संघीयताया विपक्षय् लविङ्ग यायेगु गलत परम्परा व संस्कार घानाः नेवाः स्वायत्त राज्य संघर्ष समिति छु गुकथं न्ह्याः वनीगु खः, धाये थाकु । संघीयता, धर्म निपेक्षता, अग्राधिकार लगायत खँय् संघर्ष समितिया घटकया हैसियतं च्वनीपिसं थःपिन्त स्पष्ट यायेहे माः । मखु, पार्टीपाखें थुकियात कयाः धारणाहे मदयेकूनि वा दयेकूगु मदुनिसा उज्वःपिं व्यक्तितय्त संघर्ष समितिया घटकया रुपय् तयेगु छुंनं हालतय् उचित जुइ मखु । एकताया प्रकृयाय् दुहां वनेगु मनस्थिति दयेका वयाच्वंगु संघर्ष समितिं थुखे पाखे गम्भीररुपं ध्यान बीमाः ।

केवल पार्टीया प्रतिनिधित्व जुल, सोच न्ह्याःगु जूसां ज्यू, खास पाइ मखु धकाः दंगु औपचारिकताय् लिकुनेत स्वल धाःसा लिपा वनाः थुकिं तःधंगु समस्या पिहां वइ, मवइहे मखु । नेवाःत छप्पँ खः, छधी खः । थ्व खँयात केवल औपचारिकताय् जक सीमित मयासे व्यवहारय् नं लागू यायेगु स्वयेमाः । थुकिया छगू बल्लाःगु माध्यम नेवाः दुनेया विभेदयात कायेफु । नेवाः दुने विभेद मदु धकाः एकता दिवसय् सन्देश बीगु कुतः जुइगु बांलाः । कानूनी रुपं नं विवेदयात स्वीकार जुइमखु । तर व्यवहारय् दयाच्वंगुयात हुइगु ज्या उलि क्वातुक्क वनाच्वंगु मदु । थीथी नेवाःतय्गु संघ संस्थाय् थुकियात कयाः इलय् व्यलय् चिवा चर्चा जू । सिद्धान्ततः विभेदया पक्ष नवायेत सुं तयार मदु । तर व्यवहारय् थुकियात हांनिसें लेहें थनाः न्हंकेगु कुतः उलि सशक्तरुपं जूगु हे मदुनि । विभेदया अन्त आवश्यक । समाजयात अग्रगमनया दिशाय् न्ह्याकेत विभेद छगू श्राप खः । थुकिया अन्त्य जुइहेमाः । नेवाः स्वायत्त राज्य संघर्ष समितिया थुगु कुतःयात च्वछायेहेमाः । नेवाः समाजय् विभेदता दु थुकियात व्यवहारय् सिद्ध यानाः क्यनेत समिति ताः लायेमाः ।

More Stories Like this