नेवाः दिवस व त्रिवि आन्दोलनय् किपूमि मिसात क्वहां वइगु
किपू (झीगु स्वनिगः)
वइगु विहिवाः यलय् जुइगु नेवाः एकता दिवसय् किपू नगरय् क्रियाशिल जुयाच्वंगु ख्वीन्यागुलिं मल्याक मिसा पुचःपाखें नेवाः स्वायत्त राज्यया नितिं सकलें थःथःपिनिगु ब्यानर नापं ज्वनाः क्वहां वयेगु धकाः बचं ब्यूगु दु । कीर्तिपुर महिला सञ्जालया ग्वसालय् म्हिगः सोमवाः किपुलिइ जूगु अन्तक्रिर्या ज्याझ्वलय् मिसा पुचःया प्रतिनिधितय्सं नेवाः दिवसया झ्वलय् सतकय् क्वाहां वयेगु नाप नापं किपूमितय्सं त्रिविइ थःपिनिगु हक अधिकारया नितिं व पुलांगु सम्झौता कार्यन्वयनया नितिं आन्दोलन याइगु इलय् थःपिं सक्रिय जुयाः ब्वति कायेगु बचं नं बियादीगु खः ।
