न्यान्हुया दुने नाटकीय चमत्कार जुइ
येँ (झीगु स्वनिगः)
राष्ट्रसंघीय मिसन अनमिनया प्रमुख करिन लेनग्रेनं पुस मसान्तय् थः नेपालं विदा जुइ न्ह्यः न्यान्हुया दुने हे नेपालय् नाटकीय कथं चमत्कारी जुयाः हिउपाः वइ धकाः विश्वास प्वंकादीगु दु । म्हिगः सोमवाः पत्रकार सम्मेलन यानादिसें वय्कलं न्ह्याबलें नं नेपालय् अन्तिम इलय् चमत्कार यानाच्वंगु खँ न्ह्यथसें आः न्यान्हुया दुने हे नेपालय् दलतय्सं चमत्कारी याइ धकाः थःम्हं आशा यानागु खः धकाः नं धयादिल । वय्कलं आः सेना व ल्वाभः अनुगमनया व्यवस्था यायेत विशेष संयन्त्र दयेका न्ह्याः वने फयेमाः धकाः नं धयादिल । राष्ट्रसंघया सुरक्षा परिषदय् थःम्हं नेपाःमि जनतां तायेकाच्वंगु भावना खः धकाः थःम्हं तयागुयात नेपाःया संचार माध्यमं गलत कथं प्रचारप्रसार यात धकाः नं धयादिल ।
