माओवादी—एमाले सहमत
येँ (झीगु स्वनिगः)
एकीकृत माओवादी व एमालेया नेतातय् दथुइ राष्ट्रसंघीय मिसन अनमिनया ज्या यायेगु नितिं ब्यागलं कथंया संयन्त्र दयेकेगु सवालय् सहमति जूगु दु । माओवादीया नायः पुष्पकमल दाहाल प्रचण्ड व एमालेया नायः झलनाथ खनालया दथुइ म्हिगः सोमवाः जूगु वार्ताय् अथे सहमति जूगु खः । माओवादीया लडाकुया अनुगमन व रेखदेखया नितिं अनमिनया विकल्पय् ब्यागलं कथं संयन्त्र दयेके माःगु नापं व हे संयन्त्रं न्हापा अनमिनं ज्या यानाः वयाच्वंगु थें हे नेपाली सेनायात नं रेखदेख याइ धकाः धाःगु दु ।
माओवादी व एमालेया दथुइ सहमति जूसां अथे व्यागलं कथंया संयन्त्र दयेकेगु सवालय् नेपाली कांग्रेसं धाःसा स्वीकार यानाः मच्वंगुलिं आः कांग्रेसलिसे वार्ता यायेगु धकाः नं सहलह जूगु खः । कांग्रेसं आः अनमिनया ज्या सेना समायोजन विशेष समितिपाखें याकेमाः धकाः अडान तयाः वयाच्वंगु दु । अनमिन नेपालय् च्वनीगु धैगु थ्व हे पुस महिना तक जक खःसा अनंलिपाया म्याद थप मयाःगुलिं अनमिन स्वतः हे लिहां वनीगु अवस्था ब्वलनाच्वंगु दु ।
