समिकरण त्वाथलेगु कांग्रेसया ख्याच्वः

एमालेया खँ न्यनाः पौडेल हीमी चाल

येँ (झीगु स्वनिगः)

नेपाली कांग्रेसं नेकपा -एमाले)यात वाम लोकतान्त्रिक गठबन्धन अर्थात वर्तमान राजनीतिक समिकरण त्वाथलेगु ख्याच्वः ब्यूगु दु । कन्हय् बुधवाः २८ गते व्यवस्थापिका संसदय् जुइगु १७ क्वःगु प्रधानमन्त्रीया चुनावय् कांग्रेसया उम्मेदवार रामचन्द्र पौडेलयात भोत मबिल धाःसा समिकरण हे त्वादली धकाः एमालेया नेतातय्त ख्याच्वः बियादीगु खः । म्हिगः सोमवाः सिंहदरवाय् च्वंगु एमालेया संसदीय दलया ज्याकुथिइ जूगु वार्ताय् अथे कांग्रेसया नेतातय्सं एमालेया नेतातय्त ख्याच्वः ब्यूगु खः । कांग्रेसया नेतातय्सं प्रधानमन्त्रीया चुनावय् एमालें मत मबिल धाःसा वर्तमान कामचलाउ सरकारय् कांग्रेसपाखें दुथ्यानाच्वंपिं मन्त्रीतय्त लितसःतेगु जुइ धकाः नं ख्याच्वः ब्यूगु खः ।

वार्ताय् कांग्रेसया नेतातय्सं प्रधानमन्त्रीया चुनावय् थःपिन्त मत बिइत इनाप याःगु खःसा एमालेया नेतातय्सं रामचन्द्र पौडेलया उम्मेदवारी लित कयाः प्रधानमन्त्रीया नितिं न्हूगु हे प्रक्रियां न्ह्याः वनेत ग्वहालि यायेत इनाप यानादीगु खः । वार्ताय् एमालेया खँ न्यनाः हीमी चायादीम्ह पौडेलं अनं पिहां वयाः संचारकर्मीतलिसे छुं हे खँ मल्हासे तंचायाः वंगु खः । वार्तालिपा कांग्रेसया महामन्त्री विमलेन्द्र निधिं धाःसा प्रधानमन्त्रीया चुनावय् थःपिन्त ग्वाहालि यात धाःसा एमालेलिसे सहकार्य निरन्तरता जुइ मखुसा मन्त्रीमण्डलं ब्यागलं च्वनेगु जुइ धकाः धयादीगु दु । वार्ताय् एमालेया नायः झलनाथ खनाल, प्रधानमन्त्री माधवकुमार नेपाल, वरिष्ठ नेता केपी शर्मा ओली, भरतमोहन अधिकारी अले कांग्रेसया सभापति सुशील कोइराला, संसदीय दलया नेता रामचन्द्र पौडेल, महामन्त्री विमलेन्द्र निधि, नेता कृष्ण सिटौला व मेमेपिन्सं ब्वति कयादीगु खः ।