बैतडी राष्ट्रिय मिसा क्रिकेटया सेमि फाइनलय्

यल (झीगु स्वनिगः)

क्षेत्र नम्बर ६ बैतडी यलय् न्ह्यानाच्वंगु राष्ट्रिय मिसा क्रिकेट धेंधेंबल्लाः कासाया सेमि फाइनलय् थ्यंकेत ताःलाःगु दु । पुल्चोक इन्जिनियरिङ कलेजय् म्हिगः आइतवाः जूगु धेंधेंबल्लाः कासाय् क्षेत्र नम्बर एक विराटनगरयात ६ विकेटं बुकूसें धेंधेंबल्लाः कासाय् बैतडी सेमि फाइनलय् थ्यंगु खः । न्हापां ब्याटिङ यानाः त्याकेगु नितिं विराटनगरं ब्यूगु ८८ रनया लक्ष्ययात बैतडीं १५ ओभरय् चार विकेट तंकाः कासा पूवंकाः समूह 'बी' या उपविजेता जूवंगु खः ।

अथेहे म्हिगः जूगु मेगु धेंधेंबल्लाः कासाय् क्षेत्र नम्बर ५ नेपालगञ्जं क्षेत्र नम्बर ८ पोखरायात एक सय आठ रनया आपालं ल्याःया अन्तरं बुकूसें समूह 'बी' या त्याकाःमि जुइत ताःलाःगु खः ।
त्याकेगु नितिं एक सय पचास रनया लक्ष्य काःगु पोखरां १६ दशमलब दुई ओभरय् अलआउट जुयाः एक्चालिस रन जक दयेकेत ताःलाःगु खः । थ्व स्वयाः न्ह्यः टस त्याकाः न्हापां ब्याटिङ याःगु नेपालगञ्जं निर्धारित २० ओभरय् चार विकेट तंकाः एक सय ४९ रन दयेकेत ताःलाःगु खः । नेपालगञ्जया नितिं मय्जु सीता रानां दकले अप्वः ६५ व मय्जु नेरी थापां ३९ रन दयेकूगु खः । नेपालगञ्जं सेमि फाइनलय् मंगलबाः क्षेत्र नम्बर तीन येँलिसे उगु धेंधेंबल्लाः कासा म्हितीगु जूगु दु ।

More Stories Like this