नेवाः स्वायत्त राज्य मंकाः संघर्ष समिति

येँ (झीगु स्वनिगः)

नेवाः स्वायत्त राज्य मंकाः संघर्ष समितिं वइगु पुस २९ गते बृहत नेवाः एकता दिवसया इलय् हे संविधान पिथनेमाःगु माग यानाः हनीगु जूगु दु । न्हापाया दँ मंकाः संघर्ष समितिं नेवाः स्वायत्त राज्यया माग तयाः दशरथ रंगशालाय् औपचारिकरुपं नेवाः स्वायत्त राज्य घोषणा याःगु खः । थीथी राजनीतिक पार्टीतय्गु भातृ संगठनत दुगु संघर्ष समितिं म्हिगः येँय् छगू भेलाया ग्वसाः ग्वयाः नेपाल सम्बतया तिथिकथं दच्छिदुने पुस २९ गते नेवाः स्वायत्तताया नितिं नेवाःत संगठितरुपं आन्दोलनय् दुगु क्यनेगु नितिं यलया थीथी लागाय् शक्ति प्रदर्शन यायेगु तयारीयात लिपांगु रुप ब्यूगु दु ।

संघर्ष समितिं जातीय, क्षेत्रीय व भाषिकरुपं आत्मनिर्णयया अधिकारलिसे अग्राधिकार दुगु नेवाः स्वायत्त राज्ययात विधिवत्रुपं इलय् हे संविधान पिथनेगु नितिं ख्याच्वःकथं थ्व ज्याझ्वः यायेत्यंगु खः । ज्याझ्वलय् छुं ई न्ह्यः नेवाः राजनीतिक सम्मेलनं पारित याःगु थीथी घोषणात व आन्दोलनया ज्याझ्वःयात औपचारिकरुपं जनअनुमोदन यायेगु नितिं सभाया ग्वसाः ग्वयाः संविधानसभाया नायःयात न्हापा ब्यूगु थीथी ज्ञापन पौया विषयसं न्ह्यथनेगु व थ्वहे विषययात कयाः समितिइ दुगु एकीकृत नेवाः राष्ट्रिय मुक्ति मोर्चा, नेपाल लोकतान्त्रिक नेवाः मञ्च, ज्यापु महागुथि, ज्यापु समाज, नेवाः देय् दबू लगायतया गुंगू संस्थातय्सं थःगु तयारी पूर्णरुपं क्वचायेके धुंकूगु दु ।