फलफूलय् अनावश्यक कर तल - व्यवसायी

येँ (झीगु स्वनिगः)

नेपाल फलफूल व्यवसायी सङ्घया झिंगुक्वःगु साधारणसभा आइतवाः क्वचाःगु दु । उगु साधारणसभाया उलेज्या सत्रय् न्ववानादिसें येँ महानगरपालिकाया कार्यकारी अधिकृत आनन्दराज पोखरेलं कुलेश्वरस्थित सङ्घया परिसर क्षेत्रय् भौतिक पूर्वाधार विकास यायेत कुतः जुयाच्वंगु वय्कलं जानकारी बियादिल ।

कार्यकारी प्रमुख पोखरेलं सङ्घया परिसर क्षेत्र जःखः सरसफाई, वृक्षारोपण व सङ्घयात माःगु जमिन महानगरपालिकां उपलब्ध यायेत तयार दुगु जानकारी बियादिल । नेपाल फलफूल लिसे तरकारी व्यवसायी महासङ्घया नायः खोमप्रसाद घिमिरें लँपुया समस्यां बजाःतक्क फलफूल हयेत असुविधा जुयाच्वंगु धयादिल । सङ्घया नायः नारायण धितालं फलफूल आयात यायेबलय् राजमार्गया थीथी थासय् व्यवसायीं अनावश्यक कर पुलेमाःगु व उकिया मार उपभोक्तायात लानाच्वंगु नुखः खँ तयादिल ।

More Stories Like this