कृषिया व्यावसायिक विकासया नितिं अभियान

येँ (झीगु स्वनिगः)

येँया दक्षिणभेगया किसानतय्त व्यावसायीकरणपाखे उन्मुख यायेगु उद्देश्यं सेतीदेवी गाविस - ६ स्थित कामधेनु मावियात कृषि शिक्षालययारूपं विकास यायेगु योजना न्ह्यःने न्ह्याकूगु दु । थुगु क्षेत्रय् कृषिया प्रचुर सम्भाव्यता दुगु जूसां नं व्यावसायीकरण जुइमफूगु अवस्थायात मनन् यासें स्थानीय सङ्घसंस्था लिसे स्थानीयबासीया कुतलय् कृषि शिक्षालय पलिस्था यायेगु लक्ष्य लिसे अभियानया शुरुवात याःगु खः । देय्या अप्वःगु बेरोजगारीया समस्यायात व्यावसायिक शीप विकासया माध्यमं स्थानीयस्तरपाखें समाधान यायेफु धइगु खँय् विश्वास तइपिं थनया स्थानीयबासी थ्व इलय् कृषि शिक्षालयया पलिस्थाया नितिं न्ह्यज्याःगु दु । थुगु क्षेत्रय् पुष्प व्यवसायनिसें फलफूल, तरकारी, पशुपालन, मत्स्यपालन लगायतया थीथी सम्भाव्यता दुगु धयादीम्ह कृषि शिक्षालय अभियानय् सक्रिय कामधेनु माविया प्रधानाध्यापक आनन्द पुरी कृषिया सम्बन्धय् जनस्तरय् नवीनतम प्रविधिया सम्बन्धय् सैद्धान्तिक लिसे प्रयोगात्मक जानकारी बिइगु नितिं नं कृषि शिक्षालय अभियान न्ह्याकूगु जानकारी बियादीगु खः ।

कामधेनु माविया दर्तालिसेया जग्गा २६ रोपनी लिसे दर्ता प्रक्रियाय् दुगु १४ रोपनी जग्गाया लिसलिसे मेमेगु सार्वजनिक पूर्ति जग्गायात कृषि शिक्षालयया नितिं उपयोग यायेफइगु अवस्था नापनापं मध्यनजर यासें थुगु माविइ कृषि शिक्षालय पलिस्था यायेत्यंगु वय्कलं धयादिल । कृषिया व्यावसायिक विकास जुइफूसा रोजगारीया नितिं युवात उखेंथुखें जुयाः च्वनेमाःगु अवस्थायात सहजरुपं समाधान यायेफइगु धयादिसें वय्कलं येँया दक्षिण भेगय् कृषि शिक्षालय निर्माणया थुगु अभियानयात शिखरापुर शीप विकास केन्द्रयापाखें महत्पूर्ण ग्वाहालि यायेगु प्रतिबद्धता नापं प्वंकादिल ।
शीप विकासया नितिं सञ्चालन याइगु तालिमया प्रयोगात्मक पक्षयात ध्यान मब्यूसा तालिमत उपलब्धि विहीन जुइफूगु खँय् बहः बिइगु येँया दक्षिण भेकय् वंगु छुं दँ न्ह्यःनिसें क्रियाशील संस्था समुदायया नितिं विद्यालय अभियानया मू छ्याञ्जे निरज श्रेष्ठ कामधेनु माविइ कृषि शिक्षालय पलिस्था यायेफूसा थुगु भेकया सर्वसाधारण तसकं लाभाम्वित जुइगु धयादिल । कृषि शिक्षालय अभियानया योजनायात ताःलाकेत सेतीदेवी गाविस ज्याकूपाखें न्यागू लाख च्यय्न्याद्वः विनियोजन जुइधुंकूगु जानकारी बियादिसें कामधेनु माविया प्रधानाध्यापक आनन्द पुरीं अभियानया सफलताया नितिं स्थानीय राजनीतिक दल, स्थानीय समाजसेवी लिसे सरोकारवालाया सकारात्मक कुतः जुयाच्वंगु नापं वय्कलं धयादिल । शुरुइ सिटिइभिटीपाखें कृषि विषयक ज्याझ्वः लिसे तालिम सञ्चालन यायेगु योजना याःगु जानकारी बियादिसें वय्कलं ज्याझ्वःयात स्थानीय मागकथं थप यानाः यंकेगु लक्ष्य तयातःगु नापं न्ह्यथनादिल ।

More Stories Like this