बैठक च्वच्वं हे मदुम्ह बसुनारां

एकीकृत ने.क.पा. -माओवादी) पार्टीया एराहिटी लागाया स्थानीय कमिटीया बैठक थिंलागा दशमि -पुष १५ गते) सनिलया ५ः०० बजे च्वनेगु सुचं वःगु कथं न्ह्याब्लें थें जिपिं बसुनारायण दाइया छेँय् वनागु खः । पासापिं दक्व मवःनिगु कारणं पाहाँ कथं झायादीम्ह इलाका सेक्रेटरी गीता पनेरुं अनौपचारिक सहलह यायेत इनाप यानादीगुलिं सवा पाँच बजे सहलह न्ह्याकाः । उगु सहलहखय् बसुनारायण दाइपाखें एराहिटी युवा क्लब भवनया दयेके ज्या पूमवनाच्वंगुलिं च्यूता प्वंकादिसें क्लब भवन दुगु जग्गाय् भूमाफियातय्सं मिखा तयाच्वन धैगु खँ वयाच्वन धयादिल, अथे जूगुलिं पार्टीं थुकिइ गम्भीर जुइमाःगु धयादिल । खय्तला एराहिटी लागा येँ महानगरपालिकाया १५ व १६ वडा लिसें इचंगु गा.वि.सं. नं लाःगुलिं ज्या सनेत प्रशासनिक कथं समस्या दयाच्वंगु खः, अले उगु क्लव भवन इचंगु गा.वि.स.य् लाःगु व क्लबया न्हूधाः नं मजुयाच्वंगुलिं समस्या वयाच्वंगु खः । छुं ई लिपा पासापिं दक्व थ्यंकः वयेधुंका औपचारिक कथं बैठक न्ह्याकेगु खँ जुल । अनं लिपा बसुनारां दाइ च्या धायेत दनावन । छय्यात च्या दयेकि धयाः कोथाय् दुहांवंम्ह वय्कः मुसु ततं दुहां वल, निथु स्वथुति मुसु तयेधुंका भचा थाकुया वल धयाः छतय् थहां झाल । छुं ई लिपा चःति चःति जुयाः कोथाय् दुहांवःम्ह वय्कःया मुसु धाःसा द्युगु मखुनि, वय्कलं झोला छपाः ज्वनाः खइ नं फानादिल, खइलय् हि नं भचा भचा खने दु थें च्वं । जिमिसं छु जुल धयाबले सास ल्हाये थाकुया वल धयादिल, जिं चुरस गुलि तक त्वना धकाः न्यनाबले व हे न्हिखुन्हु खुपुति त्वना धयादिल । जिपिं दक्वस्यां आवलिं चुरस त्वने मजिल धकाः ब्वविया । वय्कःयात लासाय् ग्वारातुलादिसँ धयाबले ख्वाउँगु थाय् हे ज्यू धयादिल । अनंलिपां वय्कःया छय् क्वाः लः दायेकेत वन, छम्ह पासा वय्कःया काय् सुजेन सःतेत वन व छम्ह पासा छेँ लिक्क च्वंगु वासः पसलं डाक्टर ब्वना हये धकाः वन । वासः पसलं छम्ह मनू तूरुन्त हे वल व जांचे यानास्वःबले ब्लड प्रेसर तसकं हाइ जुयाच्वन, गुलि फु उलि याकनं हस्पितल यंकेत धाल ।

छम्ह पासा वनाः ट्याक्सि काः वन व मेपिं पासापिसं वय्कःयात क्वबियाः छेँ क्वय् थ्यंकाः, उब्ले तक ट्याक्सि हये धुंकुगु जुल । ट्याक्सिइ तयाः वय्कःयात न्ह्योनेसं च्व्ांगु जनमैत्री हस्पितलय् यंका, डाक्टर चेक याःबले बसुनारां दाइ मदयेधुंकल धाल, जिमिसं पत्याः हे याये मफु । म्ह थिया स्वयां क्वाः नि, थुलि घटना मुक्कं झिगू मिनेटया दुने हे जुल । जिमिसं डाक्टर नाप भचा हाले धुंका वय्कःयात भेन्टिलेटरय् तल । तर वय्कः मदये धुंकूगु पुष्टि जुइवं छेँजःपिं पासापिं ख्वयाहल । जिमित छु तं छु तं थें जुयावल, संसारय् छुं हे मदुथें जुया वल । हस्पितलय् हिसिला दिदि, पार्टी जिल्ला इन्चार्ज पवनमान श्रेष्ठ, निर्वाचन क्षेत्रया इन्चार्ज सुशिल नापं क्षेत्रया यक्व हे पासापिं मुं वल । सुनां हे पत्याः याये फूगु मखु । बसुनारायण दाइया सिथयंके ज्या कन्हय् खुन्हु जक जुइ धैगु खँ जुइवं बहनी आठ बजे मेपिं पासापिन्त वये म्वाःल धयाछ्वया । अन्तिम ई तक नं समाजया भिं जुइगु ज्याय् चिन्तन यानादीम्ह वय्कः जिमिगु नितिं न्ह्याब्लें प्रेरणा जुयाः च्वनी । वय्कः मदुगु बुखँ एराहिटी लागाया मेमेगु पार्टीया पासापिं जिपिं ति हे दुखि जूगु जिं खना । वय्कःया छेँजः पिन्त धैर्यधारण यायेफयेमा धकाः नं कामना यानाच्वनाः ।
(दिलिप श्रेष्ठया नापंया खँल्हाबल्हा पाखें)

More Stories Like this