एराहितिया मदुम्ह समाजसेवी बसुनारांया लुमन्ति

मदुम्ह बसुनारायणया म्हसीका

लतमान भाइ महर्जन व रत्नदेवीया न्याम्हम् सन्तान कथं वि.सं. २०१४ श्रावण महिनाय् इतुम्बहाःया ताहाननिइ बसुनारायण महर्जनया जन्म जूगु खः । वय्कःया स्वम्ह तता , दाजु छम्ह पुननारायण व केहेँ छम्ह दुगु खः । वय्कःया जहान मंगलदेवी दच्छि न्ह्यो जक मदुगु खः । वय्कःया बिहा जुइधुंकूम्ह म्ह्याय् छम्ह व काय् सुजेन महर्जन दु । राजनीति व समाजसेवाय् थःत पानादीम्ह वय्कः लिपांगु इलय् एकीकृत ने.क.पा. -माओवादी)इ सक्रिय जुयाच्वनादीगु खः । संगठनया बैठकय् ब्वतिकयाच्वंगु इलय् तसकं मुसु वयाः थाकुयाः वयेवं बालाजुया जनमैत्री हस्पिटलय् वासः यायेत यंकु यंकुं ने.सं. ११३१ थिंलागा दशमि -पुस १५ गते) मदुगु खः । वय्कःया अन्त्येष्टि पुस १६ गते इन्द्रायणि घाटय् जूगु खः । वय्कःया सीम्हय् एकीकृत ने.क.पा. (माओवादी)या केन्द्रीय दुजः लिसें काठमाडौं जिल्ला इन्चार्ज पवनमान श्रेष्ठं पार्टीइ ध्वाँय् फायेका दिलसा एकीकृत नेवाः राष्ट्रिय मुक्ति मोर्चाया येँ जिल्ला नायः उमेश स्थापितं मोर्चाया ध्वाँय् फायेकादिल । वय्कः मदुम्ह बसुनारायण महर्जनयात अन्तिम विदाइ बीत गुथियारत, सलसं पार्टी कार्यकर्ता, एराहिटी त्वाःया दाजु किजापिनिगु उपस्थिति दुगु खः । वय्कःया सीम्हय् काय् सुजेनं मि तःबले उपस्थित दक्वस्यां मिखाय् ख्वबि लःलः धाःगु खः ।

पकनाज्वःया नेपाल युवक मा.विं. एस एल सि पास यानादीम्ह वय्कलं सरस्वति क्याम्पसं प्रवीणता प्रमाणपत्र पास यानादीगु खः । वय्कः स्कुलय् आखः ब्वनाच्वंबले निसें मेपिं सुयात छुं परे जुल धाःसा निस्वार्थ कथं ग्वाहालि यायेत न्ह्यचिलीगु स्वभाव याम्ह खः धैगु खँ वय्कःया कलेजया पासापिसं कनादी । वय्कः ताहाननि त्वःताः वि.सं. २०३८ सालय् बनस्थलि, एराहिटीइ च्वंवंगु इलय् उगु त्वालय् मिखां भ्याये जू थाय् तक बुँयाबुँ जक, छेँ छखा निखा जक हे दुगु खः, लँ नं द्यांचा जक हे, धः लः मत छुं हे मदुगु खः । वय्कःया हे क्रियासिलताय् एराहिटी लागाय् १२ फिट या लँ दयेकेत ताः लात । वय्कःया हे क्रियासिलताय् २० फिटया लँ चायेकेगु, खानेपानीया लाइन हयेगु व मतया पोल तयेगु ताः लायेधुंकाः एराहिटीइ छेँ यक्व हे दयावल ।

२०४६ सालया आन्दोलनं निरंकुश पञ्चायती व्यवस्था क्वःदलाः बहुदलीय व्यवस्था वयेधुंकाः वय्कः एमालेया दुजः जुया राजनीतिइ सक्रिय जुयादिल, तर वय्कलं एराहिटीया बिकासया खँ वइबले पार्टी राजनीति सिबें च्वय् च्वनाः ज्या सनादीगु, वय्कःया थ्व हे गुणं यानाः एराहिटी टोल सुधार समितिया संस्थापक नायः जुयादिल व वय्कःया हे कुतलय् कल्भर्ट पुल दयेकेगु लिसें सतक पिच यायेत नं ताः लात । २०५४ सालय् एमाले विभाजन जूबले वय्कः एमालेया राष्ट्रघाति ज्याखँयात कुं खिनाः मालेय् संगठित जुयादिल । लिपा माले एमालेया एकिकरण जुलं नं मेपिं पासापिं एमाले जूवनं नं वय्कः एमाले जुइत अस्विकार यानादिल । बरु समाजसेवाय् हे थःत पायेगु कुतः यानादिल । वय्कलं नेवाःत उत्पीडन मुृक्त जुइगु खःसा राज्य सत्ताया मालिक जुइ माःगु अनिवार्यतायात थुइकाः नेवाः राष्ट्रिय मुक्ति मोर्चाय् संगठित जुयादिल व मोर्चाया वडा समिति, क्षेत्रीय समिति व लिपांगु इलय् मोर्चाया निर्वाचन क्षेत्रीय समितिया सल्लाहाकार जुयाः ज्या सनादिल । नेवाः आन्दोलनया नितिं एराहिटी व जःखः वय्कः निर्विवाद नेवाः न्ह्यलुवाः नेता कथं स्थापित जुयादिल । वय्कः लिपांगु इलय् एराहिटी टोल सुधार समितिया सल्लाहाकार, एराहिटी युवा क्लवया सल्लाहकार जुयाच्वनादीगु खः । वय्कः एकीकृत माओवादी पार्टीया क्षेत्रीय कमिटीया दुजः लिसें एराहिटी लागाया इन्चार्ज जुया ज्या सनावयाच्वंम्ह खः । वय्कः नेवाः आन्दोलनया न्ह्यलुवाः जुयाः खनेदुसां उगु लागाय् स्वनिगः पिने वयाः च्वंवःपिनिगु नितिं हामा -अभिभावक) कथं हे खः धकाः उगु लागाया गैर नेवाःतय्सं तक नं तारिफ यायेगु याः । पिनें वःपिं उगु लागाय् वलधाःसा वय्कःयात स्वापू तःवने हे धुंकीगु, ल्वापुख्यापु जूसां नं वय्कःया मध्यस्थता अनिवार्य जुइगु । वय्कःया अभाव नेवाः आन्दोलन लिसें एराहिटीया समाजं गुब्सं पूवंके मफइगु क्षति कथं जुयाब्यूगु दु ।

More Stories Like this