अधिवेशन ला न्ह्यात तर .....

अन्ततः नियमित अधिवेशन न्ह्यात । माओवादीया विशेष अधिवेशनया नितिं दर्ता जूगु समावेदन लित कायेकाः छवाःया दुने सःतेगु धाःगु नियमित हिउँदे अधिवेशन म्हिगः निसें न्ह्याःगु दु । छवाःया दुने धाःसां पुस २५ गतेनिसें न्ह्याःगु अधिवेशनया निंतिं सरकार व उकी सहभागी दलतय्सं धाःसा खास तयारी याःगु खनेमदु । विना तयारीया थुगु अधिवेशनं प्रधानमन्त्री ल्यज्या व छुं विधेयकयात पारित यायेगु वाहेक मेगु छुं जुइ ख्वाः मवः । देशय् न्हूगु सरकारदयेके मफूगु अवस्थाय् नीतिगत छुनं खँ हयेगु अनुचित जुइ । काम चलाउ सरकारं दीर्घकालिनरुपं प्रभावितयाइगु छुंनं नीतिगत खँय् ल्हाः तयेगु बांलाःगु खँ मखु । गैर लोकतान्त्रिक परिपार्टीं गठीत कतांमरि सरकारं प्रतिपक्षय् च्वनाच्वंगु माओवादीयात आंशिक वजेट हये धकाः सहमति यानाः अन्ततः पूर्ण वजेट हयाः सरकारं घों लायेगु ज्या यायेवं संसददुने उकिया विरोध जुल । तर सरकारं याःगु बदमासीयात लोमंकाः वजेटया खँय् माओवादीं अवरोध यात धकाः मिडियातय्सं व्यूगु खँ सही मखु । आंशिक वजेटय् सहमति यानाः पूर्ण वजेट हयाः वेइमानी याःम्ह सरकारं आः उकियात संसदय् छु गुकथं न्ह्यःने हइगु खः धाये थाकु । थुकियानितिं प्रतिपक्ष नाप खँ व्याकेगु ज्या जूगु मदुनि ।
थुगु अधिवेशनय् प्यंगू विधेयक, बाहेक प्रधानमन्त्रीया ल्यज्या मू विषय जुइ । न्हूगु सरकार मदयेकं मेगु छुंनं विषयत थुगु अधिवेशनय् दुत हयेमज्यू । तर वर्तमान कामचलाउ सरकारं उकथंया "मज्यू" धयागुयात "ज्यू" यायेत लिफ तक स्वइ मखु जुइ ।

झिंखुक्वःतक्क चुनाव जुयाः नं लिच्वःपिहां मवःगु चुनाव प्रकृयाय् याकःचा उम्मेदवार जुयाच्वंम्ह कांग्रेसी संसदी दलया नेता व प्र.म. याकःचा उम्मेदवार रामचन्द्रयात छुंहे प्रभाव त्वःताच्वंगु मदु । छगू मखु छगू त्वहतयाः सरकारय् प्या प्यपुने थें प्यपुना च्वंपिं कांग्रेस-एमालें सहमतिया निति माओवादी गुलि गुलि लिहां वन उलि उलि त्वह मदुगु त्वह तयाः छगू धुंकाः मेगु अवरोधत थनेगु यानावयाच्वंगु दु । याकःचा उम्मेदवार रामचन्द्र पौडेलयात झिंखुक्वः बूसां उकियात बूगु मधासे गवलें लोकतन्त्रया नितिं धयावःगु दु, गवलें क्यान्टोमेन्ट खाली मजूतले उम्मेदवारी मत्वःतेगु धयावयाच्वंगु दु । आः वयाः सर्वोच्च अदालतं सांसदत तटस्थ च्वनेमदैगु निर्देशन जारी याये धुंकूगु अवस्थाय् वहुमतं अस्वीकार याइगु निश्चित खः । थुगु पृष्ठभूमिइ न्हूम्ह प्रधानमन्त्री ल्यइगु प्रकृया वारे अझनं स्पष्ट मदुनि । न्हापाहे वैकल्पिक नियमत दयेकाः प्रधानमन्त्री ल्यज्याय् दुहां वनेमाःपिं दलत विना तयारी, व विना विकल्प चुनाव प्रकृयाय् हत्थासं दुहां वंगुया कारणं वंगु खुला बर्वाद जूगु खः । आः खुन्हु उगु प्रकृयायात निरन्तरता वीगु पाखे वनेमज्यू । संविधानसभाया दकले तःधंगु दलयात प्रधानमन्त्री जुइगु मौका वियाः लोकतान्त्रिक परिपाटीयात निरन्तरता वीगु ज्या यातधाःसा ल्यं राजनीतिक गतिरोधत नं याकनं पूवनी । चुनावं बूपिसं वा म्हो जक सिट दुपिसं सरकारया नेतृत्व यायेगु खँ सिद्धान्ततः गलत खः, व्यवहारय् नं सही जुइफैमखु -शत्य थ्वहे खः ।

More Stories Like this