नेवाः मोर्चा किपू नगरया सम्मेलन माघ १५ गते
येँ (झीगु स्वनिगः)
एकीकृत नेवाः राष्ट्रिय मुक्ति मोर्चा किपू नगर -येँ क्षेत्र नं. १०) या सम्मेलन वइगु माघ १५ गते सांस्कृतिक झाँकी नापंया जुलुस पिकया तःजिक याइगु जूगु दु । नेवाः मोर्चा किपू नगरया नायः बैकुण्ठ महर्जनं बियादीगु जानकारी कथं माघ १५ गते किपूया पांगा दोवाटो लागांनिसें जुलुस पिकयाः पांगाया लाछिइ थ्यंकाः उद्घाटन समारोह यानाः नेवाः मोर्चाया सम्मेलन जुइ ।
अथे नगरया सम्मेलनया झ्वलय् वइगु माघ ७ गते वडा नं. ८, १०, ११, १२ या सम्मेलन ८ गते वडा नं. ३, ४, ५, ६, १३, १४ या सम्मेलन, १२ गते वडा नं. १ व २ या अले १४ गते वडा नं. १५ या नेवाः मोर्चाया सम्मेलन याइगु जुइ धकाः नं जानकारी ब्यूगु दु । उगु हे कथं नेवाः मोर्चाया सम्मेलनया नितिं भेला, मुँज्या नं निरन्तर रुपं याइगु जूगु दु । एकीकृत नेवाः राष्ट्रिय मुक्ति मोर्चाया जिल्ला सम्मेलन माघ २८ व २९ गते यायेगु नितिं येँ जिल्ला दुनेया क्षेत्र, नगर, गां व वडाया सम्मेलन यायेगु थाय् थासय् तयारी यानाच्वंगु दु ।
