भारतय् वनाच्वंम्ह राजदूतयात पदमुक्त यायेत सरकारयात निर्देशन

येँ (झीगु स्वनिगः)

व्यवस्थापिका संसदया अन्तर्राष्ट्रिय सम्वन्ध तथा मानव अधिकार समितिं भारतय् वनाच्वंम्ह नेपाःया राजदूत रुक्मशमशेर राणायात तत्काल हे पदमुक्त यानाः लित सःतेत वर्तमान कामचलाउ सरकारयात निर्देशन ब्यूगु दु । समितिं डाबर नेपालया प्रवन्ध निर्देशक तकं जुयादीगु कारणं राणायात पदमुक्त यायेत निर्देशन ब्यूगु खः । उद्योगया गैर कानूनी ज्याय् अख्तियारं छानवीन यानाच्वंम्ह वय्कःयात अथे राजदूत याना तयेगु पाय्छि मजू धकाः न्ह्यथसें म्हिगः च्वंगु अन्तर्राष्ट्रिय सम्वन्ध तथा मानव अधिकार समितिं सरकारयात उगु कथं निर्देशन ब्यूगु खः । डाबर नेपालय् राणाया २ दशमलब ५ प्रतिशत सेयर दु । म्हिगः आइतवाःया समितिया मुँज्याय् एकीकृत माओवादीया सीपी गजुरेल, एमालेया राधा ज्ञवाली, कांग्रेसया कमला थापा नापं गुम्ह हे दुजःतय्सं वय्कः राणायात कारवाही यानाः लित सःतेमाः धकाः धयादीगु खः ।

नेपाल ओलम्पिक कमिटीया नायःया रुपय् राणां याःगु चीन भ्रमणया विषयसं नं समितिं चासो काःगु दु । राणाया मेगु भूमिकाया कारणं नं नैतिक व कनूनी रुपं नं वय्कःयात राजदूतय् तयेगु उचित मजू धकाः समितिं निर्णय याःगु दु । समितिं परराष्ट्र सचिव मदन भट्टराईयात तकं अधिकारीत नाप सहलह ब्याकेत निर्देशन ब्यूगु दु । अथे हे सीपिनिगु क्षतिपूर्ति ध्यबा तकं थःगु निजी खाताय् तःगु अभियोगय् साउदी अरबया नितिं नेपाःया राजदूत हमिद अन्सारीयात छानवीनयाना कारवाही यायेत समितिं सरकारयात निर्देशन ब्यूगु दु । उगु समितिं अनमिनया उपस्थिति मदये धुंकाः मुलुकय् ल्वापु ख्यापु तच्वयाः मानवअधिकर उल्लंघनया घटनाया विषयसं सहलह यायेत प्रधानमन्त्रीलिसे नं खँल्हायेगु धकाः क्वःछ्यूगु दु ।