प्रम चुनावं एमालेया मुँज्या च्वने मफुत

बुधवाः २८ गते १७ क्वःगु प्रधानमन्त्रीया ल्यज्या

येँ (झीगु स्वनिगः)

सर्वोच्च अदालतं चुनावय् तटस्थ च्वने मदु धकाः आदेश बिइ धुंकाः आः बुधवाः २८ गते जुइगु प्रधानमन्त्रीया चुनावय् छु यायेगु धैगु खँय् विवाद जूगुलिं एमालेया केन्द्रीय कमिटीया मुँज्या च्वने हे मफुत । घोषित ज्याझ्वः कथं म्हिगः एमालेया केन्द्रीय कमिटीया मुँज्या च्वनाः प्रधानमन्त्रीया चुनावया सवालय् छु यायेगु धैगु विषयसं आधिकारीक धारणा क्वःछिइगु धयातःगु खःसा विशेष यानाः केपी शर्मा ओली पक्षया नेतातय्सं कांग्रेसया प्रधानमन्त्रीया उम्मेदवार रामचन्द्र पौडेलयात मत बिइमाः धकाः बहः ब्यूगु नाप नापं कांग्रेस सत्ताय् दुथ्याःगु मेमेगु दलया नेतातय्सं नं उगु हे कथं दबाव ब्यूगुलिं एमालेया नायः झलनाथ खनाल नापं मेमेपिं नेतातय्त ज्यामछिनाः केन्द्रीय कमिटीया मुँज्या तकं च्वने मफुगु खः धकाः एमालेया छम्ह नेतां धयादीगु दु ।

एमालेया केन्द्रीय कमिटीपाखें खास यानाः न्हापा हे प्रधानमन्त्रीया उम्मेदवारी कांग्रेसया नेता रामचन्द्र पौडेलया विपक्षय् मतदान यायेगु नापं संसदया विशेष अधिवेशनया नं विपक्षय् मतदान यायेगु धकाः खँ क्वःछिना तये धुंकूगु खःसा आः वयाः उगु कथंया पुलांगु निर्णययात हे फातापुइकेगु कुतः ओली पक्षधर नापं कांग्रेस सरकारय् दुथ्याःगु दलतय्सं कुतः याःगुलिं समस्या ब्वलनाः अथे केन्द्रीय कमिटीया मुँज्या मच्वंगु खः धकाः धाःगु दु । मेमेगु दलया नेतातलिसे नं सहलह यानाः जक प्रधानमन्त्रीया चुनावया सवालय् खँ क्वःछिइ माःगु जुयाः अथे एमालेया केन्द्रीय कमिटीया मुँज्या स्थगित यानागु नापं थौं सोमवाः हे स्थायी समितिया मुँज्या च्वनीगु जूगु दु । थ्व हे दथुइ व्यवस्थापिका संसदया म्हिगः आइतवाः च्वंगु मुँज्यां वइगु २८ गते बुधवाः प्रधानमन्त्रीया नितिं ल्यज्या यायेगु जूगु दु । थुगुसीया चुनाव १७ क्वःगु जुइ । चुनावय् याकःचा उम्मेदवार पौडेल खः।