'माओवादीं विद्रोह याइमखु'
थनिंनिसें संसदया अधिवेशन, २८ गते प्रमया नितिं चुनाव
येँ (सन्ध्या टाइम्स)/नेपाली कांग्रेसया सभापति सुशील कोइरालां आःया अवस्थाय् एकीकृत माओवादीं म्हुतुं विद्रोह यायेगु धयाच्वंसां धाथें विद्रोह धाःसा गुगुं नं हालतय् याइ मखु धकाः दावी यानादीगु दु ।
माओवादीं विद्रोह यायेगु धकाः ख्याच्वः बिउसां नं सामान्य आन्दोलन जक याइ धकाः न्ह्यथसें ग्यायेमाःगु आवश्यकता मदु धकाः नं वय्कलं धयादीगु दु। नेपाल प्रेस युनियन मकवानपुरं थौं हेटौंडाय् याःगु पत्रकार भेटघाट ज्याझ्वलय् कांग्रेसया सभापति कोइरालां अथे धयादीगु खः ।
वय्कलं धयादिल, 'जिं प्रचण्डयात नापलानाः सहलह यानागु दु, वय्कलं जनविद्रोह शब्दावली जक खः धयादीगु दु आःया अवस्थाय् शब्द प्रयोग याःसां जनविद्रोह हे जुइगु मखु ।'
सभापति कोइरालां अनमिन प्रमुख करिन ल्यानग्रेनं न्ह्यब्वयादीगु प्रतिवेदनं अन्तर्राष्ट्रिय समुदाययात भ्रम ब्वलंका बिउगु नापं नेपाःमि जनतायात त्रास ब्वलंका बिउगु दु धयादिसें उकियात कयाः आपत्ति तकं प्वंकादिल ।
कांग्रेसया प्रधानमन्त्री उम्मेदवार रामचन्द्र पौडेल हे आःया संसदया अधिवेशनय् त्याइ धकाः दावी यानादिसें वय्कलं आः सरकारया नेतृत्व यायेगु पाः नं कांग्रेसया हे खः धयादिल ।
थ्वहे झ्वलय् ब्यवस्थापिका संसदया नियमित अधिवेशन थनिंनिसें न्ह्याइगु जूगु दु। थुगुसीया संसदया अधिवेशनं प्रधानमन्त्री ल्ययेगु ज्या न्ह्याकी। थौंया संसदया बैठक सनिलय् प्यताः इलय् च्वनेत्यंगु खः। थौं अथे बैठक जुइ धुनेवं सभामुख सुवासचन्द्र नेम्वाङं वइगु २८ गते बुधवाः प्रधानमन्त्री ल्ययेगु नितिं चुनाव यायेगु जुइ धकाः घोषणा यानादी ।
थौं अथे संसदया बैठक च्वने न्ह्यः हे संसदया कार्य व्यवस्थापन समितिया बैठक च्वनीगु जूगु दु। सभामुख नेम्वाङं २८ गते लिपा आः न्ह्यानाच्वंगु प्रधानमन्त्रीया चुनावी प्रक्रिया अन्त्य जुइ धकाः सार्वजनिक रुपं हे न्ववानादी धुंकूगु दु। थनिंनिसें संसदय् २८ दल जुइगु जूगु दु ।
