नेवाः विरुद्धया षडयन्त्र असफल यायेमाः

डी. आर. खड्गी

खसब्रम्हू नेतात लोभी व स्वार्थी जूगुलिं राजनीतियात व्यापारीकरण यानां मगानाः विदेशीया ईशाराय् प्याखं हुलाः देशयात बर्वाद यानाच्वंगु दु। खसब्रम्हूतय्सं राजनीति जक थःगु ल्हातय् काःगु मखु, मिडिया नं थःगु ल्हातय् कयाः जनतायात ल्वाकेगु व झंगः लायेगु ज्या यानाच्वंगु दु। वास्तवय् मिडिया धइगु छगू सशक्त हतियार खः। भिडियां हे देशयात भिं वा मभिं लँय् वनेत तःधंगु भूमिका म्हिताच्वनी। विशेष यानाः विकासशील देशय् मिडिया सही, स्वतन्त्र व निष्पक्ष ढंगं संचालन जुयाः जनतायात चेतनशील व जागरुक यायेगु ज्याय् मू वंगु भूमिका म्हिताच्वंगु दइ। थुज्वःगु देशया नेतातय्सं अनैतिक ज्या यानाः थःगु व्यक्तिगत स्वार्थ पूर्तिपाखे ध्यान बी मखु। छाय्धाःसा थनया मिडियां सही, स्वतन्त्र व निष्पक्ष जुयाः सही विश्लेषण यानाः जनताया न्ह्यःने प्रस्तुत यानाच्वंगु दइ। झीगु देशय् जक राजनीति व मिडिया निगुलिं छगू हे जातिया ल्हातय् लाःगुलिं नेतातय्सं भ्रष्टाचार यानाः देश स्यंकाच्वंसां मिडियां तमासा स्वयाच्वनी। झीगु देशय् गुलि नं भ्रष्टाचारया काण्ड जुयाच्वंगु दु व फुक्क काण्ड लिपा फासांफुसुं जुया वनाच्वंगु दु। खय्त ला मेमेगु देशय् नं भ्रष्टाचार मजूगु नं मखु तर मेमेगु देशय् भ्रष्टाचार बारे छुं भचा जक चर्चा जुल धाःसां सरकारं तुरुन्त छानबिन यानाः दोषीयात सजाय बीगु ज्या याइ ।

जनतायात शिक्षित, जागरुक व चेतनशील यायेगु ज्याय् मिडियाया तःधंगु ल्हाः दु धइगु खँ सिउसां नं थनया खसब्रम्हूतय्गु पत्रपत्रिकां नकारात्मक सन्देश बीगु ज्या जक यानाच्वंगु दु। अप्वः मिडियात भ्रष्ट नेतातय्गु व विदेशी ध्यबाय् डुबे जुयाच्वंगु दु। थुकिया कारणं मिडिया सही ढंगं प्रस्तुत जुइ फयाच्वंगु मदु। यदि मिडिया सही ढंगं प्रस्तुत जुयाः जनताया जागरण व चेतना वृद्धि यायेगु ज्याय् ध्यान बियाच्वंगु खःसा जनता न्ह्यःने बढे जुयाः अनैतिक ज्या याइपिं नेतातय्त ठीक लँय् हयेत स्वइगु जुइ। मिडियां सही, सत्यतथ्य खँ च्वयेगु हिम्मत व आँट याये फयाच्वंगु मदु। अथे जुयाः नेपाः व भारतया दथुइ गुलि नं जलश्रोतया विषयय् सम्झौता जुल उकिं नेपाःयात तःधंगु हानी व भारतयात तःधंगु फाइदा जुयाच्वंगु दु। जलश्रोतया असमान सन्धि बारे मिडियातय्सं च्वयेगु आँट मयाःगु जक मखु भारतया पक्षं वकालत तकं यानाच्वंगु खनेदु। यदि खसब्रम्हूया मिडिया भचा जक जूसां देश व जनताप्रति जिम्मेवार जूगु जूसा सन् १९५० या राष्ट्रघाती सन्धियात जनताया न्ह्यःने हयाः भण्डाफोर यायेमाःगु खः। आः तक मिडियातय्सं सन् १९५० या सन्धिया 'झीगु बुँदा थथे खः' धकाः जनताया न्ह्यःने हयेगु आँट तक मयाःगु कारणं जनता भ्रमय् लानाच्वंगु खः। अझ सन् १९५० या सन्धि स्वयाः नं खतरनाक सम्झौता ला दिल्ली वनाः च्यागू दलं यानावःगु १२ बुँदे सम्झौता खः। थुगु खतरनाक सन्धिया कारणं फौजीकरण अथवा भुटानीकरण जुइगु सम्भावना अप्वयाच्वंगु दु। विश्वय् गनं नं देश व जनतायात मिडियां झंगः लायेगु ज्या यानाच्वंगु मदु। खालि झीगु देशय् जक हे मिडियां भ्रष्ट नेता व विदेशीतय्गु ध्यबा नयाः गलत ढंगं ज्या यानाच्वंगु थें च्वं। अझ थुकिया लिसें देशभक्त नेता व जनतायात तकं माइनस यायेगु ज्या यानाच्वंगु खनेदु ।

वंगु वालय् नेपाल वायुसेवा निगमया कार्यकारी अध्यक्ष सुगतरत्न कंसाकारयात भ्रष्टाचार मुद्दाय् फँसे यानाः निगमयात ध्वस्त याःगु धासें मुद्दा दायर यात। छाय्धाःसां सुगतरत्न कंसाकार धइम्ह दूरसंचार संस्थानया च्वय्या पदय् च्वनाः उगु संस्थानयात सुधारात्मक लँय् यंकूम्ह मनू खः। कंसाकार दूरसंचारं लिहां वंसेंलि थीथी कथंया काण्डत जुयाच्वंगु दु। खय्त ला वायुसेवा नियम नं कंसाकार वये न्ह्यः तसकं खराब अवस्थाय् लानाच्वंगु खः। तर कंसाकार वसेंलि निगमयात सुधारया लँय् न्ह्याकाच्वंगु खः। थुगु हे इलय् भ्रष्टाचारी नेता व हवाई माफियाया षड्यन्त्रं निगम ध्वस्त यायेगु चाल म्हिताः मुद्दा तल। झीसं खनाच्वनागु हे दु, २०४६ सालपाखे प्रजातन्त्रवादी धाःपिं नेतातय्सं पाय्छि ढंगं संचालन जुयाच्वंगु उद्योगत ध्वस्त यानाः कवाडीया भावं मिया बिउगु खः। २०४६ सालंनिसें हे खसब्रम्हू नेतात भारतया ईशाराय् प्याखं हुलाः झीगु देशया उद्योग व्यवसाय ध्वस्त यायां वनाच्वंगु दु। समाजवादी देश चीन व सोभियत संघं ग्वाहालि कथं दयेका बिउगु उद्योग ध्वस्त याः थें निगमयात नं ध्वस्त यायेगु निंतिं धमिजा काण्ड, लाउडा काण्ड व चेज काण्ड यानाः अतिकं हे नोक्सान यायेधुंकूगु दु। वायुसेवा निगमय् सुगतरत्न कंसाकार वयेधुंकाः निगम सुधारया लँय् वनाः निगः एयरबस न्यायेगु तयारी यानाच्वंगु इलय् खसब्रम्हू नेतातय्सं भ्रष्टाचारय् फँसे यायेगु खेल म्हिताच्वंगु दु। अझ पर्यटन वर्षयात तकं असफल यायेत स्वयाच्वंगु दु। स्वनिगःबासी नेवाःतय्त आः जक मखु न्हापांनिसें खसब्रम्हू नेतातय्सं षड्यन्त्र यानाः माईनस यानाच्वंगु खः। उकी नं खसब्रम्हू नेतातय्गु षडयन्त्रय् फँसे जुइ धुंकूपिं नेतात गणेशमान सिंह, तुल्सीलाल, पद्मरत्न आदि खः ।

साधारण हिसाबं स्वयेगु खःसा सुगतरत्न कंसाकारया मुद्दा व्यक्तिगत थें च्वं। वास्तवय् थुकिया लिउने स्वदेशी व विदेशी शक्तिया तःधंगु षडयन्त्र दु। नेपाःया देशभक्त जनता अप्वः गैर खसब्रम्हूत हे खनेदु। उकी मध्ये नं नेवाःत न्ह्यःने लानाच्वंगु दु। नेवाःतय्सं हे देशया म्हसीका विश्वयात बीगु निंतिं साँस्कृतिक व कलाकृतिया विकास याना वयाच्वंगु खः। आः वयाः सत्ताय् च्वंपिं गैर नेवाःतय्सं नेवाःतय्त माईनस यायां साँस्कृतिक व कलाकृति नं ध्वस्त यायां देशया अस्तित्व समाप्त यायेत स्वयाच्वंगु दु। अथे जूगुलिं सुगतरत्न कंसाकारयात जक लक्षित यानाः भ्रष्टाचारया मुद्दाय् फँस यायेत स्वयाच्वंगु मखु, फुक्क नेवाःतय्त षडयन्त्र यानाः माईनस यायेत स्वयाच्वंगु खः। यदि थ्व भ्रष्टाचारया मुद्दां छम्ह व्यक्तियात जक फँसे यायेत्यंगु खः धइगु भाःपिल धाःसा थ्व नेवाःतय्गु दुर्भाग्य जुइफु। यदि नेवाःत फुक्क छप्पँ जुयाः देशघाती भ्रष्ट नेतातय् विरुद्ध सशक्त संघर्षय् कुहां वयाः झी विरुद्ध षडयन्त्र यानाच्वंपिं गैर नेवाःतय्त खबरदारी याये मफुत धाःसा नेवाःत छम्ह-छम्ह यायां समाप्त जुजुं वनी ।

drkhadgi@gmail.com

More Stories Like this