नेपाः बारे अनमिन प्रमुखया प्रतिवेदन
राष्ट्र संघीय मिशन अनमिनया प्रमुख करिन लेनग्रेनं नेपाःया बारे राष्ट्र संघय् लःल्हाःगु प्रतिवेदनयात कयाः नेपालय् कडा टिप्पणी पिहां वःगु दु। वय्कलं न्ह्यब्वयादीगु प्रतिवेदनय् शान्ति प्रक्रिया ताःमलाःगु कारणं नेपालय् राष्ट्रपति शासन वा सैनिक कू जुइफुगु खँ न्ह्यथनातःगु दुसा वय्कःया थ्व टिप्पणीं यानाः नेपालय् राष्ट्रपति, प्रधानमन्त्रीं तकं कडा प्रतिक्रिया बियादीगु दु। लेनग्रेनया थ्व प्रतिवेदनं नेपाः व राष्ट्र संघया स्वापू झन हे स्यना वनीगु सम्भावना ब्वलंका बिउगु दु ।
वास्तवय् लेनग्रेनं नेपालय् सैनिक कू वा राष्ट्रपति शासन लागू जुइफुगु खतरा दु धकाः न्ह्यब्वयादीगु प्रतिवेदन धाथें नं नेपाःमितय्त थारान्हुइकी कथंयागु दु। वय्कःया प्रतिवेदनं आपालं नेपाःमितय्त झसंग वंका बिउगु दु। तर नेपाःया शासकतय्सं वय्कःया प्रतिवेदनयात मौखिक रुपं आलोचना जक यानां थ्व खँयात खण्डन धाःसा याये फइ मखु। उकी धयातः थें राष्ट्रपति वा सेनां देय्या तरल अवस्थाया लबः कयाः छुं हे याये मत्यंगु धाःसा मखु। राष्ट्रपतिपाखें आः थम्हं हे छुं याये माली लाकि धकाः बिचाः कालबिल समेत याःगु चर्चा पिहां वःगु हे खः। सेनाय् नं पुलांम्ह सेनापतिं अज्याःगु हे छुं पलाः छी मालीगु बारे बिचाः ब्याकूगु खँ नं पिहां वःगु हे खः। थ्व अथें फसय् पिहां वःगु चर्चा मखु। थौं देय् गुगु राजनीतिक शून्यता ब्वलनाच्वंगु खः उकियात कयाः धायेगु खःसा थुकथंया घटना मजुइ नं धाये मफु। स्वय्म राजनीतिक पार्टीया नेतातय्सं हे नं थज्याःगु खँ न्ववायेगु यानाच्वंगु दु। सखे अनमिन प्रमुखं थःगु रिपोर्टय् थज्याःगु खँ उल्लेख याःगु नं थ्वहे कारणं जुइमाः ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
