दुर्गालालया हे न्ह्यःने दयेकल दुर्गालालया मूर्ति

सीला साय्मि

जनकवि दुर्गालाल श्रेष्ठयात हे प्रत्यक्ष न्ह्यःने तयाः सार्वजनिक रुपं वय्कःया मूर्ति दयेकेगु ज्या म्हिगः जुल। येँया बसन्तपुली म्हिगः थ्व ज्याझ्वः जूगु दु। १८ इन्च साइजया बाम्ह जक दुगु वय्कःया मूर्ति दयेकेत कलाकारतय्त खुघौ बित ।

वय्कःया उगु मूर्ति ज्यापु समाज यलया युवा समिति (कल्याण कला केन्द्र) या स्वम्ह कलाकारपिं राजकुमार महर्जन, गौतम महर्जन व दिनेश महर्जनं दयेकूगु खः। ज्यापु समाज यल व कल्याण कला केन्द्रया मंकाः ग्वसाः व सिन्हःस्वां खलः येँया व्यवस्थापनय् म्हिगः उगु सार्वजनिक ज्याझ्वः जूगु खः ।

मूर्ति दयेकादीपिं कलाकारतय्सं वंगु २०६५ साल भाद्र ९ गतेनिसें खुलाया मूर्ति दयेकेगु प्रशिक्षण कयादीगु खः। वय्कःपिंत वरिष्ठ मूर्तिकार राजेश अवालें प्रशिक्षण बियादीगु खः ।

व्यक्तिया सम्मान यायेगु खःसा म्वाःबलय् हे यायेमाः धइगु आज्जु ज्वनाः वय्कःपिंसं थथे जीवित व्यक्तिपिनिगु, व नं वय्कःपिनि हे उपस्थितिइ मूर्ति दयेकेगु ज्या यानागु खँ ग्वसाः खलकं धाःगु दु। वय्कःपिनि योजना कथं नेपालभाषा ख्यःया टप फिगरपिनिगु व ज्यापु समाज यलया पीगू त्वाःया थकालि गुरुपिनिगु मूर्ति दयेकाः ज्यापु समाज यलया म्यूजियमय् तयेगु ग्वसाः दु। थ्वहे झ्वलय् नीछम्ह थकालि, प्यम्ह ज्यापु समाज यलया नायः, संस्कृतिविद् सत्यमोहन जोशी व पत्रकार दानदास श्रेष्ठया मूर्ति दयेकेधुंकूगु दु। थ्व फुक्कं मूर्तित नापं हे जनकवि श्रेष्ठया मूर्ति नं उगु हे म्यूजियमय् तयेगु ग्वसाः दुगु खँ नं धाःगु दु ।

इच्छा दुपिं मनूतय्त जक स्यनाः स्वदेशी रोजगारया व्यवस्था यायेगु उद्देश्यं हे थथे सार्वजनिक स्थलय् मूर्ति दयेकेगु ज्या यानागु खँ वरिष्ठ कलाकार एवं गुरु राजेश अवालें कनादी ।

सार्वजनिक स्थलय् वयाः प्रत्यक्ष मूर्ति दयेकाः प्रचार अप्वः यायेगु कथं देशय् न्हापां खुशी वय्कःपिंसं थज्याःगु अभियान न्ह्याकूगु खः। न्हापां यलय्, अनं भृकुटी मण्डपय् मेलाय् न्यान्हु तक यानाःलि म्हिगः बसन्तपुली याःगु खः।
आःतक सेवाया भावनां जक ज्या यानाच्वनागु खःसा नं सेप्टेम्बरय् आर्ट भिलेजय् प्रदर्शनी क्वचायेकाः व्यवसायिक रुपय् वनेगु वय्कःपिनि ग्वसाः दु। वय्कःपिनि धापू कथं थज्याःगु छगू मूर्तिया मू २५,००० तकां निसें ३०,००० तकाः तक तू ।

थःगु जीवित मूर्ति स्वस्वं दंग जुसें कविवर श्रेष्ठं धयादी, 'जि खरानी जुया वंसा नं जिगु मूर्ति सदां जीवित जुयाच्वनी। थौंया दिन लसताय् नं न्हूगु लसता जूगु अनुभव जुल। थुज्वःगु मूर्ति दयेकेगु अभियान न्ह्याकूपिं कलाकारपिंत दुनुगलंनिसें आभार व्यक्त यासें थौंया सरकारं मयाःसां नं नेपाः देय् धात्थेंगु नेपाः देय् जुइबलय् अवश्य नं कदर जुइ ।'

More Stories Like this