राष्ट्रसंघया आवासीय प्रतिनिधि व प्रचण्डदथुइ नापलाये ज्या
येँ (झीगु स्वनिगः)
संयुक्त राष्ट्रसंघया आवासीय प्रतिनिधि रोबर्ट पाइपरं प्रमाणिकरणय् मलाःपिं जनसेनायान भविष्यबारे च्यूताः प्वंकूगु दु । म्हिगः सुथय् एकीकृत नेकपा माओवादीया नायः पुष्पकमल दाहाल 'प्रचण्ड'यात नापलानाः पाइपरं उमिगु भविष्यप्रति च्यूताः प्वकूगु खः । नेपाःपाखें अनमिन लिहाँ वनेत छवाः जक ल्यं दनीबलय् पाइपरं अनमिनया बहिर्गमन व जनसेनाया रेखदेख लिसे पुनःस्थापनाबारे नुगः खँ तयादीगु श्रोतं जानकारी ब्यूगु दु । प्रचण्ड निबास नयाँबजारय् जूगु बाघौ ताःहाकःगु नापलाये ज्याय् वय्कलं राष्ट्रसंघीय नियोग अनमिनं सुरक्षा परिषद्य् न्ह्यब्वःगु प्रतिवेदनप्रति सरकारपाखें वःगु प्रतिकृयाबारे नं च्यूताः प्वंकादीगु खः ।
स्रोतयाकथं पाइपरं अनमिनया अनुपस्थितिइ ल्वाभः लिसे सेनाया रेखदेखया जिम्मा काइगु निकायबारे नं नुगः खँ तयादीगु खः । लिसलय् माओवादी नायः प्रचण्डं धिसिलाःगु विकल्पविना अनमिन नेपाःपाखें लित छ्वयेगु पक्षय् मदुगु खँ नापं लिसा कयादीगु श्रोतं जानकारी ब्यूगु दु ।
