सुन्तला व्यापारपाखें प्रशस्त आम्दानी

दोलखा (झीगु स्वनिगः)

सुन्तला उत्पादनया दृष्टिं उपयुक्त कथं काइगु दोलखाया थीथी गां विकास समितिया किसानतय्सं थ्व दँ सुन्तलाया व्यापार यानाः बांलाःगु आम्दानी यायेत ताःलाःगु दु । दोलखाया पवटी, फस्कु, गैरीमुदी, सुनखानी लगायत गाविसया किसानतय्सं सुन्तला जक मियाः मनग्य आम्दानी याःगु जानकारी ब्यूगु दु । दोलखा पवटी - ७ या सुन्तला किसान रामशरण भुजेलं थ्व दँ पीद्वः तका धेबा बराबरया सुन्तला म्यूगु दुसा पवटी - ६ या वीरबहादुर भुजेलं सुन्तला मियाः ख्वीद्वः तका धेबा आम्दानी याःगु जानकारी ब्यूगु दु । भुजेलद्वय जक मखु, सुन्तलाखेती याइपिं पवटीया किसानतय्सं म्होनिं झिद्वः तका धेबानिसें छगू लाख न्यय्द्वः तका धेबातक्क आम्दानी याःगु दु । पवटी - ५ या रघुनाथ उप्रेतीं थ्व दँ सुन्तला व्यापारपाखें छगू लाख न्यय्द्वः तका धेबा आम्दानी याःगु दु ।

'जिं थुगुसी करिब छगू त्या लाख तका धेबा आम्दानी यायेधुनागु दु, अझ नं छुं छुं सुन्तला मिइ ल्यं हे दनि ।' - उप्रेतीं धयादिल - 'व्यापारीत क्यबय् हे वयेगु यानाच्वंगुलिं बजार प्रबर्द्धनय् नापं छु नं समस्या मदु ।' छुं दँ न्ह्यःतक्क जिल्लापिनेपाखें सुन्तला हयाः मिइपिं दोलखाया व्यापारीपिनिगु माग आः वयाः स्थानीय किसानतय्सं पूरा यानाः वयाच्वंगु दु । दोलखाया सुन्तला चरिकोट, तामाकोसी फलफूल बजार, जिरी लगायत बजार बाहेक जःलाखःला जिल्ला व स्वनिगलय् तक्कं थ्यंकेगु यानाच्वंगु दु । सुन्तलापाखें प्रशस्त आम्दानी जुयाः वयेवं जिल्लाया मेमेगु गाविसया किसानतय्सं नं व्यावसायिक सुन्तलाखेतीपाखे आकषिर्त जूगु दु । पवटी व फस्कु गाविसयात ल्यूने लाकूसें सुनखानी, गैरीमुदी व मिर्गे गाविसया किसानतय्सं नं छुं दँ न्ह्यः सुन्तलाया व्यावसायिक खेती यानाः वयाच्वंगु दु । जिल्ला कृषि विकास ज्याकूया प्रमुख टङ्कबहादुर कार्कीयाकथं जिल्लाया स्वसः म्ह स्वयाः आपालं किसानतय्सं व्यावसायिक रुपं सुन्तला खेती यानाः वयाच्वंगु दु ।

More Stories Like this