निक्वःगु विराट नेवाः महोत्सव न्ह्यात

विराटनगर (झीगु स्वनिगः)

नेवाः भाय् व संस्कृतियात ल्यंकेगु लिसे संरक्षण सम्बर्द्धन यायेगु मू उद्देश्यलिसे विराटनगरय् निक्वःगु विराट नेवाः महोत्सव न्ह्याःगु दु । 'नेवाः संस्कृति नेपाःया गौरब' धइगु मू नारालिसे न्ह्याःगु उगु महोत्सव पुस २३, २४ व २५ गतेतक्क अर्थात थौंतक्क न्ह्याइगु ग्वसाः खलकं जानकारी ब्यूगु दु । महोत्सवय् नेवाः भाषा, संस्कृति व परम्परा झः झः धाइगु वसः, नसा त्वंसा यानाः स्वीनिगू स्टल तयातःगु दु ।
महोत्सवया उलेज्या यानादिसें उपप्रधानमन्त्री लिसे भौतिक योजना लिसे निर्माणमन्त्री विजयकुमार गच्छदारं भाषा व संस्कृतिया विकास व जगेर्ना बिना छु नं राष्ट्रया म्हसीका मदइगु जूगुलिं उकिया जर्गेना यायेगु राज्यया प्रमुख दायित्व दुगु धयादिल ।

नेपाःया भाषा व संस्कृति पर्यटन क्षेत्रलिसे स्वानाच्वंगु न्ह्यथनादिसें वय्कलं वि.सं. २०४८ य् सञ्चार राज्यमन्त्री दुगु इलय् सञ्चार नीतिइ सुधार यानाः च्यागू भाषाय् छक्वलं समाचार वाचनया ज्या न्ह्याकूगु जानकारी बियादीगु दु । मधेशी जनअधिकार फोरम -लोकतान्त्रिक) या नायः नापं जुयाच्वनादीम्ह उपप्रधानमन्त्री गच्छदारं विकासया नितिं राजनीति यायेमाः, तर विकासय् राजनीति जूगु कारण नेपाःया राजनीति स्यंगु दु, व स्वंगू दलपाखें जूगु द्वपं बियादिल । संविधान निर्माण यायेत आः न्याला जक ल्यं दनीसां नं स्वंगू तःधंगु दल सहमत जूसा क्वःछ्यूगु इलय् संविधान दयेकेगु दाबी यासें वय्कलं तर सरकारया नेतृत्वया नितिं स्वंगुलिं दल सत्तालिप्साय् दुगु कारण संविधान मदयेकीगु दाबी यानादिल । वय्कलं क्वःछ्यूगु इलय् संविधान मदयेकूसा देय् गम्भीर दलदलय् लाःवनीगु जुयाः देय्यात गम्भीर सङ्कटपाखें पार यायेत थःगु पार्टीयात सरकारया नेतृत्व यायेगु ह्वःताः चूलाःसा ल्यं दुगु इलय् हे संविधान दयेकाः क्यनाः बिइगु प्रतिबद्धता प्वंकादिल । महोत्सव ग्वसाः खलः समितिया नायः राजन श्रेष्ठया नायःसुइ जूगु समारोहलय् सभासद् मोती दुगड, नेपाल पर्यटन बोर्डया दुजः रेवतबहादुर थापा लगायतं महोत्सवया सफलताया भिंतुना नापं वय्कलं बियादीगु खः ।

More Stories Like this