अनमिनया खँय् आपत्ति छाय् ?

राष्ट्रसंघीय मिसन, अनमिन प्रमुख करिन लनग्रेनं अनमिनया विदाइ लिपा नेपालय् शान्ति प्रकृया खटराय् लाइगु धयादीगु दु । संसदीय दलतय्गु स्वार्थया कारण शान्ति प्रकृया पूमवनीगु व राष्ट्रपति शासन वा सैनिक विद्रोइ वा माओवादी विद्रोह जुइगु सम्भावनायात कयाः तःधंगु चिउताः प्वंकादीगु दु । लनगे्रनया उगु धापू शतप्रतिशत सही मखुसां आंशिकरुपं खः धाये हे माः । तर सरकार प्रमुख प्रधानमन्त्री माधवकुमार नेपाल व राष्ट्रप्रमुख राष्ट्रपति डा.रामवरण यादवं अनमिनया उगु खँयात कयाः तःयंगु आपत्ति प्वंकादीगु दु । उकियात कयाः कुं हे खिनेमाःगु मदु । अनमिन प्रमुख लनग्रेनं थःगु मूल्यांकनया आधारय् खंगु व सम्भावित धारणा पेश यात, उकियात कयाः सार्वजनिकरुपं आपत्ति यायेगुया छुं नं जरुरत मदु । नेपाल सरकार व उकीइ सहभागि संसदवादी दलतय्सं शान्ति प्रक्रियायात खः कथं न्ह्याकेत गबलें स्वःगु हे मदु । छगू मखु छगू त्वहतयाः शान्ति सम्झौता विपरित क्रियाकलाप यानां वयाच्वंगु दु । शान्ति सम्झौताय् नेपाली सेना व जनसेनां सम्झौताया अःखः छुं नं ज्या खँ मयायेगु धयातःसां नेपाली सेनां भर्ना प्रक्रियायात चायेकाः वयाच्वंगु दु । अनमिनया अनुपस्थितिइ जनसेनाया रेखदेख विशेष समितिं याःसां नेपाली सेनाया रेखदेखया खँ हे त्वःतूगु दु ।

सेना समायोजनयात कयाः सेनां थाडै अस्वीकार यानाः छाति नापय् यानाः वा शैक्षिक योग्यता कथं जक भर्ना कायेगु खँ धयाच्वंगु दु । थुगुकथं सेना समायोजनया खँ स्पष्ट व ठोस योजनाया अभावय् दकले लिपा सरकारं ल्वाभः तयातःगु कन्टेनरया ताःचा मागय् याःगु दु । सरकारया प्रमुख प्रधानमन्त्रीं राजीनामा ब्यूगु खुला पुलं नं ल्यज्याय् छु गुकथं वनेगु धयागु स्पष्ट खँ वःगु मदुनि । थुज्वःगु स्थिति अनमिनयात पित छ्वयेगु धयागु शान्ति प्रक्रिया स्यंकेगु हे खः । भारतया उक्साहटय् राष्ट्रसंघयात थनं विदाबाजी बीगु थ्व ई मखु, अवसर नं मखु । तर नं भारतया दलाल सरकारय् च्वनाच्वंपिंसं न्ह्यात्थे यानाः नं अनमिनयात माघं निसें नेपाः त्वःतकेगु हे ज्या जूगु अवस्थाय् लनगे्रनया धारणायात उलि अस्वाभाविक व समयसापेक्ष मजू धकाः धायेफैमखु । सरकार शान्ति प्रक्रियाप्रति इमान्दार मदु, व शान्ति प्रक्रिया भंग यायेगु मानसिकता दयेका च्वन धयागु खँय् शंका यायेमाःगु मदु । शान्ति सम्झौताकथं खारेज जुइधुंकूगु पुलांगु मुद्दात हानं फाइलत चायेकाः कुद्दा चलय् यायेगु सरकारया व्यवहारं वया शान्ति मखु, द्वन्द्व हे ययेकाच्वंगु आभाष जुइ । राष्ट्रपतियात संसदीय दलतय्सं छुं नं इलय् प्याखं ल्हुइकेफैगु खँयात ध्यानय् तय्बलय् राष्ट्रपति सक्रिय मजुइ धायेफै मखु । छगू नजिर पेशनापं यायेधुंकूगु दु । गनतक्क माओवादी विद्रोहया, थ्व खँ थौंया संसदीय दलतय्गु व्यवहारय् देतनीगु खँ खः । शान्ति व संविधान दयेके ब्यूसा देश सहजरुपं न्ह्याःवनी । मखुसा विद्रोह आःथत्थें अवश्यांभावी खः ।

More Stories Like this