नेवाःतय्सं संविधानसभायात लुमन्ति पौ बिइगु

किपूयात नेवाः स्वायत्त राज्यया अभ्यास यायेगु थाय् कथं घोषणा याइगु

येँ -झीगु स्वनिगः)

वइगु पोहेलाथ्व नवमि विहीवाः (पुस २९ गते) यलय् जुइगु नेवाः एकता दिवसय् नेवाःतपाखें संविधानसभायात लुमन्ति पौ बिइगु धकाः घोषणा यानाः अनुमोदन तकं याइगु जूगु दु । वंगु दँया पोहेलाथ्व नवमि खुन्हु नेवाः स्वायत्त राज्य घोषणा याःगु दिंया लुमंकाः थुगुसी नेवाः स्वायत्त राज्य मंकाः संघर्ष समितिया ग्वसालय् जुइगु उगु नेवाः एकता दिवस सभाय् घोषणा याइगु स्मरण पतिइ क्वःछिइनातःगु इलय् हे न्हूगु संविधान च्वयेमाःगु, आत्मनिर्ण व अग्राधिकार दुगु नेवाः स्वायत्त राज्यया ग्यारेन्टी यायेमाःगु व धर्म निरपेक्ष राज्ययात संस्थागत यायेमाःगु खँ चेतावनी कथं दुथ्याइ धकाः धाःगु दु । उगु सभां आः नेवाः स्वायत्त राज्यया अवधारणा कथं अभ्यास यायेगु थाय् केन्द्रीकृत कथं हे स्थानीय निकायत मध्ये किपू नगरपालिकायात नालाः उकिया नितिं माःगु कथं भूमिका म्हितेगु धकाः घोषणा नं याइ धकाः धाःगु दु ।

नेवाः एकता दिवस थुगुसी यलय् यायेगु नितिं तयारी अन्तिम चरणय् थ्यने धुंकूगु जानकारी वःगु दु । वइगु विहिवाः यलया पूच्वं सांस्कृतिक बाजा गाजा सहित दुथ्याकाः न्ह्याकीगु जुलुस यलया ज्याउला ख्यलय् वनाः क्वचायेकेगु ग्वसाः ग्वयातःगु दु । ज्याझ्वः कथं संविधानसभायात लुमन्ति पौ बिइगु व किपू नगरपालिकाय् नेवाः स्वायत्त राज्यया अभ्यास केन्द्रीकृत कथं यायेगु धकाः पूच्वय् सांस्कृति जुलुस पिकाये न्ह्यः हे जुइगु सभाय् घोषणा याइगु जूगु दु । पूच्वय् जुइगु सभाया ज्याझ्वः कथं नेवाः एकता दिवस न्यायेकेमाःगु अवधारणा मंकाः संघर्ष समितिया सचिवालयया कजि मल्ल के सुन्दरं न्ह्यब्वयादी । अथे हे बोडेय् जूगु नेवाः राष्ट्रिय राजनीतिक सम्मेलनं पारित याःगु घोषणा पत्र, स्थानीय निकायसं हस्तक्षेपकारी ज्याझ्वः ब्वनाः न्यंकेगु नापं नेवाः दुनेया थीथी जात जातिपिन्सं राजनीतिक सम्मेलनय् प्रतिबद्धता प्वंकूगु कथं नेवाः दुने जातपातया विभेद मन्त धासें एकताया मंकाः संकल्प नं याइ धकाः धाःगु दु ।

पूच्वं न्ह्याइगु जुलुस ज्यावला ख्यलय् वनाः समापन यायेगु ग्वसाः ग्वयातःगु दु । उगु दिवस व र्‍याली फयां फक्व नेवाःत ब्वति कायेकेगु नितिं यल, येँ, किपू, थिमि नापं स्वनिगःया गां गामय् तकं भेला, मुँज्या व अन्तक्रिर्या ज्याझ्वः न्ह्यानाच्वंगु दु । वंगु शुक्रवाः मंकाः संघर्ष समितया मुँज्या च्वनाः संघर्ष समितिइ हितमान शाक्य, राजेन्द्र श्रेष्ठ, डा. केशवमान शाक्य, प्रेम शान्ति तुलाधर व डा. महेशमान श्रेष्ठयात सल्लाहकारय् तयेगु धकाः खँ क्वःछ्यूगु दु । मंकाः संघर्ष समितिं पद्मरत्न तुलाधर, माणिकलाल श्रेष्ठ, तिर्थराम डंगोल व भिमसेनदास प्रधानयात न्हापा हे सल्लाहकारया रुपय् तयातये धंकूगु दु ।

नेवाः एकता दिवसया नितिं नारा

नेवाः स्वायत्त राज्य मंकाः संघर्ष समिति —जिन्दावाद
नेवाः स्वायत्त राज्य जिन्दावाद
नेवाः एकता जिन्दावाद
आदिवासी जनजाति एकता जिन्दावाद
संघीय गणतन्त्र जिन्दावाद
धर्म निरपेक्ष राज्य जिन्दावाद
आत्मनिर्णय व अग्राधिकार
— सुनिश्चित या
इलय् हे संविधान जारी या
संघीयता विरोधी होसियार