'कू’ यायेत राष्ट्रपतियात ह्वानाच्वन : दिनानाथ शर्मा

येँ (झीगु स्वनिगः)

एकीकृत माओवादीया स्थाथी समितिया दुजः दिनानाथ शर्मां राष्ट्रपति डा. रामवरण यादवयात 'कू' यायेगु नितिं ह्वानाच्वंपिं यक्व हे दु धकाः धयादीगु दु । म्हिगः शनिवाः येँय् जूगु छगू ज्याझ्वलय् न्वंवासें माओवादीया नेता शर्मां दक्षिणपन्थी शक्तितय्सं राष्ट्रपतियात ह्वानाच्वंगु दावी यानादीगु दु ।

संविधानसभां संविधान दयेके मबिइकेगु नितिं, शान्ति प्रक्रिया पूवंके मबिइकेगु नितिं व मुलुकयात अर्थिक प्रगतिपाखे वंके मबिइकेगु नितिं अथे कुतः यानाच्वंगु खः धकाः नं दावी यानादिल । दलत सत्ताया नितिं आः गुगु कथं ल्वापु जुयाच्वन उकियात निरन्तरता बिइगु खःसा अज्वःगु अवस्था वयेफु धकाः आशंका नं यानादिल । अनमिनं नेपालय् विद्रोह, राष्ट्रपति शासन व कूया त्रास दु धकाः न्ह्यथंगु जायज हे खः धयादिसें वय्कलं अनमिनया विरोध यायेगुया छुं अर्थ मदु धकाः नं धयादिल ।