प्रमया नितिं २८ गतेलिपा न्हूगु प्रक्रियाय् वनी : सभामुख
येँ (झीगु स्वनिगः)
व्यवस्थापिका संसदया सभामुख सुवास चन्द्र नेम्वाङं वइगु पुष २८ गते तकया दुने नं प्रधानमन्त्री ल्यये मफत धाःसा आःया प्रधानमन्त्रीया चुनावी प्रणाली अत्य जुइ धकाः धयादीगु दु । दलतय्गु दथुइ क्वःछिनातःगु इलय् हे प्रधानमन्त्री ल्ययेगु बाय् आःया फुक्क प्रक्रिया अन्त्य यायेगु धैगु निगू जक विहल्प दु धकाः धयादिल । वय्कलं आः वइगु २८ गते लिपा न्हूगु प्रक्रिया कथं प्रधानमन्त्री ल्ययेमालीगु अवस्था वल धकाः नं धयादिल ।
राष्ट्रिय सहकारी बैंक लिमिटेडया साधारण सभाया म्हिगः शनिवाः उलेज्या यानादिसें सभामुख नेम्वाङं धयादिल 'पुष २८ गते दुने प्रधानमन्त्री ल्ययेगु नितिं दलतय्गु दथुइ सहमति माः दलतय्गु दथुइ सहमति मजुल धाःसा आःया फुक्क प्रक्रिया अत्त्य जुइ ।' थौं आइतवाः च्वनीगु शीर्ष नेतातय्गु मुँज्याय् प्रधानमन्त्री ल्ययेगु समवन्धय् खँ क्वःछिइमाःगु जरुरी दु धयादिसें वय्कलं थौंया मुँज्यां निष्र्कष पिकइ धैगु खँय् थः आशावादी दु धकाः नं धयादिल । राष्ट्रसंघीय मिसन अनमिन वनीगु छवाः जक ल्यं दनिगु खँ न्ह्यथसें शान्ति प्रक्रिया पूवंकेगु सवालय् दलतय् दथुइ सहमति यानाः लडाकु समायोजन यायेमाःगु खँय् सभामुख नेम्वाङं बहः बियादिल ।
