रामचन्द्र लिहां वनीगु निश्चित
न्हूम्ह प्रधानमन्त्रीइ झलनाथ खनालया नां न्ह्यःने
येँ (सन्ध्या टाइम्स)/थाति लानाच्वंगु प्रधानमन्त्री ल्ययेगु चुनाव आः कंस आइतवाः याइगु जूगु दु। प्रधानमन्त्रीया चुनाव बारे एमालें न्हापा कयातःगु तटस्थताया नीतिइ हिउपाः हःगु कारणं कंस जुइगु चुनाव नं न्हापा थें मजुसे फरक जुइगु खँ धाःगु दु। यदि चुनावय् विपक्षीइ बहुमत वल धाःसा थःपिंसं नां लित काये धकाः कांग्रेसं धयातःगु कारणं कंस जुइगु चुनाव लिपा कांग्रेसया याकःचा उम्मेदवार रामचन्द्र न्यौपानें नां लित काये मालीगु खँ धाःगु दु। एमालें वय्कःयात थम्हं नां लित कायेगुसा का मखुसा चुनावय् विपक्षय् मत तयाः बुकेगु जुइ धकाः निर्णय याना तयेधुंकूगु दु ।
तर पौडेलं नां लित कायेधुंकाः वयां लिपा प्रधानमन्त्रीया चुनाव छु प्रक्रियां वनी व सु प्रधानमन्त्री जुइ धइगु खँ धाःसा अझ नं अन्यौल हे जुयाच्वंगु दनि ।
अथे खःसां आः तकया घटनाक्रमया विश्लेषण यायेबलय् आः प्रधानमन्त्री जुइगु पाः एमाले अध्यक्ष झलनाथ खनालयात हे वनीगु सम्भावना अप्वया वंगु खँ विज्ञतय्सं धयाहःगु दु ।
एमालें आः सहमतीय सरकार गठन याये मफुत धाःसा बहुमतीय सरकार जूसां गठन यायेगु धकाः निर्णय याना तयेधुंकूगु दु। आः बहुमतीय सरकार यायेबलय् कि पार्टी अध्यक्ष झलनाथ खनालयात उम्मेदवार दयेके मालीगु जुइ, कि मखुसा वर्तमान माधव नेपालया सरकारयात हे निरन्तरता बी मालीगु जुइ। थुकिया लागिं नेपालयात कांग्रेस लगायत मेमेगु मधेशवादी पार्टीतय्गु समर्थन आवश्यक जू वनी। तर थौंकन्हय् नेपालयात साथ बियाच्वंपिं मधेशवादी पार्टीत धमाधम तज्याना वंगु कारणं न्हापा थें अःपुक बहुमत खाके फइगु सम्भावना आः मदुगु खँ सूत्रं धाःगु दु ।
उखे झलनाथ खनाल उम्मेदवार जुइगु खःसा वय्कःयात माओवादीं समर्थन यायेगु धकाः धया तयेधुंकूगु दु। खनालयात माओवादी याकःचां जक समर्थन याःसां गाः। उकिं एमालें आः अःपुक समर्थन काये फइगु पुलांगु हे समीकरणयात हानं म्वाका हइगु सम्भावना दुगु खँ नं सूत्रं धाःगु दु ।
एमालें खनालयात थ्व स्वयां न्ह्यः सहमतीय सरकार गठन यायेगु लागिं धकाः छक्वः उम्मेदवार दयेके नं धुंकूगु दु। तर वय्कःया उगु उम्मेदवारी निरन्तर जुइ वा मजुइ धइगु ठेगान धाःसा मदुनि ।
